播出日期:7/7/2020
Redmi 9 紅米9 已經推出咗喇！ 今日就同大家介紹下呢部性價比咁高嘅 redmi9 紅米 9！
小米喺2020年嘅下半年度開始之際都算動作多多，剛剛又喺香港推出全新嘅入門手機 Redmi 9 紅米9。呢部賣價唔洗HK$1000嘅手機，有無將貨就價呢？今日就同大家介紹下！
Redmi 9 配置咗 Helio G80處理器，雖然有觀眾會話「MTK 不了！」不過近來嘅聯發科處理器的確有改善，而官方就表示，對比上一代 Redmi 8，紅米9有超過100%嘅性能提升，確保一般嘅日常使用流暢。紅米9亦配備6.53寸、19.5:9 嘅全高清+ FHD+ 水滴屏幕，機身保留咗3.5mm耳機插，指紋辨識位就喺機背，真3卡設計，可以同時支援雙4G Nano-Sim卡以及一張Micro-SD外置記憶卡，彌補內置空間嘅不足。
近年大家買機最關心嘅就係相機方面嘅配置喇。對比上兩代 Redmi 7 同 Redmi 8 嘅雙鏡頭設計，紅米9追上近年嘅潮流，配置咗4個後置鏡頭，分別係1300萬像素嘅主攝廣角、800萬像素嘅超廣角、500萬像素嘅微距同埋200萬像素嘅景深鏡頭，雖然無光學變焦，像素同鏡頭嘅質素亦未係最頂級，不過以少於$1000嘅售價，應該都唔會有太多要求！
Redmi9 亦加入咗NFC功能，支援Google Pay同八達通查數及增值，以入門級手機嚟講實屬罕見。呢部機亦加咗紅外線支援，拎住當萬用遙控用，或者配合智能家居設定，都一樣無問題㗎！
紅米 9 內置咗 5020 mAh嘅電量，唔支援無線充電，不過就支援QC3.0 18W 快充，最特別嘅係配置咗USB-C 頭，充電、過料都更快更穩定，而且更追得上新一代手機嘅標準。Redmi 9 更支援反向充電，身邊有其他裝置無電都可以當行動電源用，值回票價啦！
Redmi 9 嘅香港行貨暫時只會有 3GB Ram + 32GB 內存空間版本，有碳纖灰、晚霞紫同埋海洋綠3隻顏色，定價HK$999，預計7月8日公開發售！ 而我哋之稍後時間亦都會開箱同評測呢部手機，記得留意！
