播出日期:17/8/2018
唔知大家有無試過，收到份PDF文件，但有一頁個方向唔岩，又或者想調下次序，可以點做？最傳統就梗係要用Adobe自家開發嘅Acrobat軟件。但呢套軟件出名貴，雖然坊間有其他嘅第三方代用軟件，但始終要俾錢之餘又要安裝。今日就等我介紹呢個免費嘅服務俾大家啦！
講緊嘅就係呢個 pdf2go.com 嘅服務喇。只要你部電腦可以上網，就可以做到好多修改PDF嘅功能。等我試下將原本調轉咗嘅一頁修正番先。你只要選 Rotate PDF、上載要修改嘅PDF檔案，之後你就可以用旋轉嘅選項去修改你嘅PDF檔，無問題就揀「Save Changes」，跟住就會可以下載改好咗嘅檔案喇！
要搬頁數或者刪除頁數，一樣唔難㗎！揀「Sort and Delete PDF Page」、 上載要修改嘅PDF檔案， 之後就可以好似我宜家咁，整理你要搬嘅頁數，又或者按右上角嘅刪除，就可以移走頁面。如果你發現有頁面調轉咗，呢度一樣可以幫你旋轉，做好晒之後就按「Save Changes」，下載埋個File就得喇！
除咗以上介紹嘅功能外，PDF2GO仲免費提供咗其他好似壓縮、修改、甚至幫PDF檔加上密碼嘅功能，相當齊全。提提大家，用呢類型網上服務，始終都要將你嘅檔案上載到服務供應商嘅伺服器，如果你嘅資料係好機密、又或者唔放心嘅話，就要考慮清楚當中嘅風險先好用相關嘅服務喇！
《Z世代達人》
麥卓華
