Z世代達人

播出日期:21/2/2019

三星於2019年2月21日零晨在美國三藩市發佈咗Galaxy S10系列嘅旗艦手機,對比上一代S9系列,在功能、設計以及硬件上都提昇咗唔少。等我用幾分鐘嘅時間同大家一齊睇下呀!

今次S10系列一共推出咗3款尺寸,包括 S10、S10+ 以及 S10E,當中就以S10+ 在功能上面最為強大。為咗提昇屏佔比,S10系列都轉用咗Infinity-O設計嘅 Dynamic AMOLED HDR+ 螢幕,即係相機位會在右上角開個洞,比 iphone 嘅「劉海」設計又或S9系列嘅上下粗邊更慳位,視角效果一流。新技術亦都大大減低藍光,減低對眼睛嘅損傷。手機顏色方面,3部機都會出白、綠同埋黑色,S10e 就會多一種黃色選擇,而s10+ 就會推出陶瓷白以及陶瓷黑兩個特別版本。

另外,S10同埋S10+ 兩款新機,仲加入咗超聲波屏下指紋認證技術,解決咗Galaxy 用家要將手指放在機背認證嘅不便。而S10E 亦都取消咗在機背嘅指紋認證位,搬咗去機側。 屏幕方面,分別為S10e 嘅 5.8寸、S10嘅 6.1寸同埋S10+嘅6.4寸。而S10 同 S10+ 會採用曲面屏幕,而S10e 就會用 S8/S9 都唔採用嘅平面屏幕,反而可能會吸引到另一批嘅用家。

性能上,3款S10 都用咗 QualComm S855處理器,S10e 及 S10 將會有 6GB 同 8GB 記憶體兩個版本,而 S10+ 除咗6GB 同 8GB外,仲有12GB版本,內存方便就由128GB起跳,而S10+就有最大1TB容量嘅版本,同 IPhone Xs 系列睇齊。另外,3款新機都保留咗3.5mm 嘅耳機插,亦用上支援 Quick Charge 2.0嘅USB-C 充電接口。最特別嘅就係 S10系列可以成為一個行動電源幫其他電子裝置充電,更可以成為一塊無線充電版,非常方便!要做到呢點,電量當然唔細啦,S10e、S10同埋S10+ 分別配備 3100mAH、3400mAH以及 4100mAH嘅電量,相信點都用到一日甚至兩日嘅時間。

大家相信亦會關心鏡頭上嘅提昇。S10+ 用上前2後3一共5個鏡頭嘅技術。S10+ 以及S10 後置主鏡頭分別係一個1600萬像素嘅超廣角鏡頭、同埋兩個1200像素嘅標準以及遠攝鏡頭,3個鏡頭嘅分功,就可以拍出更廣闊、更有層次嘅相片。而 S10e 亦用上咗兩個分別係1600萬超廣角以及1200萬像素嘅標準鏡。前置鏡頭方面,3部機都配備咗 1000 萬像素嘅主鏡,S10+ 就同時配備咗另一個800萬像素嘅景深鏡。官方亦表示,除咗後置鏡頭外,連前置鏡頭都可以錄到4K影片,岩晒blogger同埋自拍一族用啦!

網絡方面,3部機都支援雙卡雙待雙4G功能,支援最高 2Gbps 嘅網速,媲美5G嘅速度,不過如果要用埋 MicroSD卡,咁就要放棄用2張SIM卡喇,不過唯一出乎意料之外嘅,就係部機唔支援近一年大熱嘅 eSIM,對於想試新嘢同埋成日換卡嘅朋友仔可能就有啲失望喇。

S10系列會在已有5G網絡嘅市場推出另一部擁有6.7寸Mon嘅Galaxy S10 5G手機,不過應該就無緣在香港見到喇。但呢部5G機可能是第一批5G機嘅關係,只支援單卡,所以對於用慣Android雙卡嘅用戶反而帶來不便。香港方面,3部新嘅S10手機,將會於3月5日接受預訂,並於3月中正式發售。 三星亦在同一個發佈會上公佈咗首部接合手機 Galaxy Fold。我哋下集再講!


Z世代達人
麥卓華

追蹤我們
公司殊榮
Copyright Claims
Copyright Claims