播出日期:25/9/2019

小米喺 2019 年 9 月發佈咗全新嘅產品小米9 Pro 5G 同埋限量生產嘅 小米 Mix Alpha 5G，以全線支援 5G 為賣點，宜家即刻同大家睇吓！

首先講吓小米9 Pro 5G。呢部機採用咗幾乎最先進嘅零件，包括採用 Snapdragon 855+ 嘅處理器、配合最高 12GB 嘅記憶體同埋 512GB 嘅內存容量，絕對係頂級旗艦手機嘅標準配置。

螢幕方面用咗 6.39 吋三星 AMOLED 水滴屏，配合專業嘅顏色管理技術，進一步提升色彩嘅準確度。相機方面，小米9 Pro 後置3個分別係 4800 萬像素嘅主攝、1200 萬像素嘅人像、以及 1600 萬像素嘅超廣角加微距鏡頭，支援兩倍光學變焦，配合手機軟件嘅 AI 技術，影靚相？話都冇咁易。而前置鏡頭亦都唔弱，用上咗 Sony 2000 萬像素嘅美顏相機，自拍都一樣冇問題。

今次小米9 Pro 冇分 4G 或者 5G 版，而係所有手機都支援 5G 嘅技術。呢部手機兩個卡槽都可以支援 5G SIM 卡，最高嘅流動網絡下載速度可以達到每秒 2Gbps，
無論你係睇緊 4K 甚至 8K 電影，定係要大量下載流動應用程式甚至相片，都一樣無問題啦！

另外，小米9 Pro 亦都加入咗電競級嘅 VC 液冷散熱系統，可以為手機處理器核心最高降溫攝氏 10 度，配合手機零件同埋外殼嘅選料，當進行 5G 高速下載嘅時候，一樣唔會因為手機發熱而影響表現！另外手機內置 4000mAh 嘅電池，配合最高 40W 嘅超級有線快充技術，充滿成部機都只係需要 48 分鐘，手機亦都配備 30W 嘅無線快充、亦都同時支援 10W 無線快充其他裝置，隨時仲快過你屋企嘅舊款無線充電版啊！

今次小米9 Pro 5G 將會推出夢之白同埋鈦銀黑兩隻顏色，價錢方面介乎 3699-4299 人民幣，絕對係市面最平同埋性價比最高嘅 5G 旗艦手機。

小米同場亦都發佈咗全新嘅小米 Mix Alpha。呢部號稱可以探索未來嘅 5G 智能手機，雖然用上咗柔性可摺屏幕，但係就唔隨波逐流開發接合手機，反而發展出呢部擁有 180.6% 屏佔比嘅雙面手機 Mix Alpha。除咗正面同埋手機兩邊都係屏幕，連手機背面嘅大部份位置都由屏幕取代，相當好玩同好睇。

由於手機嘅兩邊都係屏幕，所以 Mix Alpha 採用咗虛擬控制鍵，想較大細聲甚至其他功能，掂下個邊框就搞掂㗎喇！

背面唯一唔係屏幕嘅地方，就係手機嘅鏡頭位置。喺呢個夢幻手機入邊，鏡頭又點可以冇突破呢？今次三個主鏡頭入邊嘅其中一個，係支援一億像素嘅超高清三星 H M X 鏡頭，配合超高嘅感光元件同埋尺寸，可以影出畫質細緻而且清楚嘅相片，
絕對係手機界嘅突破。

另外，手機核心同樣使用 Snapdragon 855+ 處理器、12GB 嘅記憶體、512GB 嘅內存以及支援 5G，一啲都唔失禮啦！

想買呢部手機可能就要等等同諗諗，小米初步估計要到 2019 年底先至會限量生產呢部 Mix Alpha，而價錢方面就高達 19999 人民幣。抵唔抵呀？咁就見仁見智啦！

《Z世代達人》
麥卓華

其他集數

Microsoft Surface Duo 驚喜現身！雙Mon旗艦時代來臨！[2020] Samsung Galaxy Fold

Huawei 華為 NOVA 5T - 一半價錢 旗艦速度？

信用卡增值 Smart Octopus 八達通免手續費玩法大公開！

播放中

小米9 Pro 5G 小米 Mix Alpha 2019 驚天發佈！3分鐘懶人包

華為 Huawei 全新 Mate30 / Mate30 Pro - 無 Google Mobile Service 一樣咁正？ GMS P30

Samsung Galaxy Fold 香港首試！[Samsung Galaxy Fold 2019]

讓聽障人士從「此」發聲暢談 - Pedius 手機應用程式

Apple iPhone 11 / iPhone 11 Pro / iPhone 11 Pro Max [2019] 即時睇！點都有個換走 iPhone Xs 的理由…