播出日期:24/2/2020
唔少朋友呢排都少出街，平時唔煮慣飯嘅都逼住下廚煮幾味。想煲個抗疫健肺靚湯？今集就同大家介紹呢款「霸王花煲瘦肉湯」，一步一步同你煲個靚湯。
首先睇吓今日嘅用料先！
霸王花 2-3束 （約50克）
無花果 3-4粒
蜜棗 2-3粒
紅蘿蔔 1-2個
粟米 1-2個
瘦肉 200-300克
合桃 數粒
南北杏 各1茶匙
材料嘅重量其實都係參考嘅用途，多啲少啲其實問題唔大。霸王花有潤肺、化痰、止咳嘅功效，一般喺雜貨鋪都買到，今日見到呢度嘅霸王花買咗大約 HK$10。買咗返嚟之後切走最底嘅部份，之後浸水大約 5 至 10 鐘，浸軟之後我就習慣將佢切開一段段之後用嘅。
無花果有助消化，促進腸道嘅蠕動，放落去煲之前，可以同蜜棗一齊用清水洗一洗，紅蘿蔔就要切皮，之後再切成細粒，而粟米呢，就切到一嚿嚿，南北杏、合桃等等嘅配料就用水沖一沖，瘦肉方面就要汆一汆水。我哋通常都會用滾水汆水，將切開咗嘅瘦肉放落滾水入面，大約 1 到 2 分鐘之後錨番出嚟，我就會用乾淨嘅水再沖一沖，亦都可以就咁留返之後煲湯用嘅。
搞掂晒材料之後就可以開始煲喇。將頭先準備好嘅材料一樣一樣咁放落煲入邊，加多兩三片薑，跟住之後就再加埋水。今日大約加咗 2 公升到 3 公升嘅清水之後，用大火滾水計煲大約 20 至 30 分鐘，之後就可以轉細火，再煲個半鐘左右，加入適量嘅鹽，跟住就可以上檯㗎喇！如果你唔想睇火，你亦都可以選擇喺滾水計煲大約 20-30 分鐘之後放落真空煲 3 - 4 個鐘頭，飲之前加鹽同埋再煮滾都一樣得！
