播出日期:11/5/2020
好多朋友都好似我咁鍾意食叉燒，不過去燒臘舖買又怕多油同埋多色素。今日就教大家喺屋企用氣炸鍋整健康嘅港式叉燒！
做叉燒最緊要就當然係嚿豬肉，我就揀咗用梅頭豬肉，唔算太肥亦都唔算太瘦，注重健康嘅朋友可以揀瘦肉，不過做出嚟叉燒就會韌啲，唔怕肥亦都可以用豬頸肉做。我就建議唔好買太厚，好似我呢塊咁就啱啱好喇。
之後我哋要醃一醃件豬肉，加少少生抽、叉燒醬、玫瑰露酒，跟住用手幫嚿豬肉做吓按摩，確保醃料均勻咁覆蓋成嚿豬肉，跟住就放返落雪櫃，我就建議雪過夜，不過其實雪三、四個鐘頭都 OK 嘅。
叉燒醬同埋玫瑰露酒喺一般嘅超級市場都有得賣，除咗玫瑰露酒之外，你亦都可以用紹興酒或者普通米酒取代，不過我就意用玫瑰露酒喇！
整嘅時候打開氣炸鍋，將牛油紙先鋪喺鍋入面，整完之後就唔使洗得咁辛苦。跟住將雪好嘅豬肉放入氣炸鍋入面，用 160 度火焗 5 分鐘......
跟住好似我咁，喺豬肉表面搽叉燒醬，再焗 5 分鐘，之後要小心反轉嚿豬肉，喺另一面搽叉燒醬，跟住再焗多 5 分鐘。完成之後基本上叉燒就已經成型，咁燶邊去咗邊呢？呢個時候可以用燒烤蜜糖噴霧噴 10 吓左右，轉 200 度火焗 3 分鐘，之後反轉嚿叉燒，再噴上蜜糖多焗 3 分鐘...... 買唔到燒烤蜜糖噴霧嘅朋友，你亦都可以用普通嘅燒烤蜜糖薄薄咁搽一層喺上面㗎！
搞掂！我哋上碟睇吓！冇花冇假，燶邊港式叉燒就係咁簡單！再切開嚟睇吓先！真係似模似樣㗎！
