播出日期:22/5/2020
好多想買 Samsung Galaxy S20 系列嘅朋友，都有 inbox 問過揀 S20+ 好定係 S20 Ultra 好呢。雖然 S20 Ultra 嘅相機配備係無得輸，不過大家都擔心會唔會太大部，而且價錢又貴一截，十五十六之際，今日就等我同大家做個開箱比較！
S20+ 同埋 S20 Ultra 香港賣緊嘅行貨都係用緊高通 SnapDragon 865 旗艦級嘅處理器，支援 5G 技術，分別配置咗 6.7 寸同埋 6.9 寸、3200 x 1440 解像度嘅 Dynamic AMOLED 2X Infinity-O 極限全屏幕，兩部機都係用 USB Type-C 插頭，同埋無 3.5mm 嘅耳機插，操作上好似 Sidebar、多功能分屏嘅功能都完全一樣。
重量方面，S20 Ultra 比 S20+ 重 34 克，可能因為背後相機模組嘅設計關係，S20 Ultra 拎上手明顯較重同埋墜手，重量亦都側重上半部嘅鏡頭位，S20+ 嘅手感反而就比較好，重量分佈平均好多。單手操作方面，對於好似我隻手較大嘅人來嚟講，就算 Ultra 咁大部都一樣可以勉強單手操作，如果自問手細又成日要單手操作手機，就要留意呢樣嘢喇！
機背嘅鏡頭模組厚度亦都值得提吓，S20 Ultra 突出嘅厚度比較明顯，如果你有用保護殼嘅，部機就會變咗更加厚喇，相反 S20+ 嘅突出位就唔算誇張，整體嚟講，S20+ 嘅手感同埋外觀的確比 S20 Ultra 討好！
相機方面，Dxomark 對於 S20 Ultra 嘅評分係 122 分，而 S20+ 就係 118 分，分數算係唔錯，亦都肯定咗 S20 Ultra 喺 SpaceZoom 同埋整體嘅相機技術。如果經常要 Zoom 嘅朋友，S20 Ultra 就一定係不二之選！唔係一定會用到佢嘅 100 倍變焦咁誇張，但係影遠嘢，用 S20 Ultra 嘅 10 倍混合光學變焦，就一定好過 S20+ 嘅 3 倍混合光學變焦。不過如果你成日拎起手就隨手影幾張相嘅話，用咗 Dual Pixels 自動對焦嘅 S20+ 1200 萬像素嘅廣角主鏡頭，喺對焦方面就反而會快過同埋靚過 S20 Ultra 嘅 PDAF 1 億 800 萬像素廣角主鏡頭喇。喺前置鏡頭方面亦都一樣，像素方面，S20 Ultra 嘅 4 千萬像素一定高過 S20+ 嘅 1000 萬像素前置鏡頭，不過因為對焦技術上嘅分別，S20+ 嘅Selfie 對焦會快啲同埋準啲。不過都要補充一句，正常使用嘅情況之下，分別其實唔算好大。
考慮咗咁多嘢，價錢亦都可能係其中一個重要嘅因素。S20+ 同埋 S20 Ultra 行貨價分別係 $7998 同埋 $9998，相差 $2000。而另外一個主要嘅考慮因素，就只有 S20+ 有提供除咗黑、灰之外嘅粉藍色選擇。不過如果你想內存多啲，S20+ 就只有 128GB 嘅版本，而 256GB 同埋 512GB 嘅版本就一定要揀 Ultra 喇！
我嘅建議係，鍾意追最新技術、手夠大、又要容量大嘅朋友，可以揀 S20 Ultra，如果要 Elegant 啲、又成日隨手拎起電話就影相嘅朋友，S20+ 就會啱你多啲喇！
《Z世代達人》
麥卓華
其他集數
iPhone ApplePay 八達通 Smart Octopus終登場！ 1分鐘快速設定教學！要唔手續費？加埋Suica得唔得一片睇晒！- Z世代達人
華為 HUAWEI 5G Mobile WiFi Pro E6878 開箱！電量功能大躍進 iPhone 即變 5G 機！ E6878-370 Pocket Wifi
紅米 RedMi 10X 5G 手機 HK$1760 來襲！光學變焦、NFC、OIS光學防震樣樣齊！
Samsung Galaxy S20 Ultra vs S20+ 開箱比較！貴 2000 蚊值得嗎？原來 S20+ 有好過 S20 Ultra 嘅地方？
【香港5G】人人有份免費用 5G 80GB 數據 30 日！3 分鐘教你登記及升級！華為P40 Pro 小米10 Samsung Galaxy S20
自由鳥 Birdie 2020 出新 Plan 吸唔吸引？教你變相累積剩餘數據 Data！
HUAWEI P40 Pro 香港開箱實測！率先試高德地圖導航 + HUAWEI AppGallery 用唔用得慣？
HUAWEI P40 Pro 香港開箱實測！ LEICA 超靚鏡頭 + AI 功能完美演繹機皇定義！ AI精彩瞬間 路人消除 反光消除
