播出日期:14/8/2020
小米盒子出咗幾年，早前小米就發表咗Mi TV Stick小米電視棒，行正宗Android TV版，有Play Store，今日我就收到呢支Mi TV Stick喇，一齊同大家Mi TV Stick 開箱！xiaomi tv stick
打開包裝盒之後，終於見到呢支 MiStick 嘅真身。同一般USB手指相比雖然比較大，但係都十分輕便。MiTVStick小米電視棒旁邊設有一個MicroUSB頭，支援充電同埋增加裝置，盡頭就係一個標準嘅HDMI插頭，可以直接插落電視。包裝入邊亦都有遙控器同埋充電插頭。遙控器同一般電視盒子嘅遙控差唔多，以藍牙操作，充電插頭只用上咗1A嘅電力，所需要嘅電量唔多，如果你個電視有一A以上嘅USB頭，基本上連電線都慳返。
等我插落部電視試吓先。開機之後，首先選擇語言，跟住就選擇地區。可能因為我手上呢支MiStick係歐洲國際版嘅緣故，地區嘅選項並冇香港或者中國，咁唯有求其揀個啦！
跟住我揀咗直接喺呢個電視介面設定同埋登入Google帳戶，大約幾分鐘就設定完成喇。相信大家最關心嘅就係呢支支援1080p嘅MiTVStick只有1GB 記憶體同埋8GB內存空間，行起上嚟會唔會窒呢？雖然唔可以用「快」嚟形容，不過同其他內置Android嘅電視介面比較，速度都係差唔多嘅，唔算特別窒㗎。
打開Play Store，就會見到一系列唔同嘅程式選擇。電視版本嘅Play Store只會收錄適合電視介面嘅程式，關香港事嘅其實唔太多，好似ViuTV、HMVOD、Netflix或者HBO Go咁，等我下載個ViuTV試吓先！本來諗住喺1GB嘅記憶體之下睇串流影片應該都有排等，不過又有啲喜出望外，影片無窒之餘，Load嘅時間亦唔算耐，我都收貨嘅。
當你係手機睇緊片，一樣可以用內置嘅Chromecast功能，寫上電視慢慢睇，㩒個掣..... 搞掂！
暫時香港並無Mi TV Stick嘅行貨賣，海外嘅售價大約賣緊HK$300左右，另外Mi TV Stick將來亦會有支援4K嘅2GB版本，價錢應該貴大約$100至$200。想知幾時有行貨賣？記得留意我哋嘅節目呀！
