播出日期:3/5/2021
我哋先前已經介紹過全新推出嘅Amazfit T-Rex Pro智能手錶，今日我哋就有一隻喺手，馬上就同大家做個開箱！
全新嘅Amazfit T-Rex Pro 延續咗呢個系列硬朗嘅風格，拎上手雖然同一般智能手錶一樣輕身，但係感覺上明顯較為紮實，戴上手嘅觀感亦相當唔錯，好似我咁鍾意運動款同埋大錶面嘅朋友嚟講就更加唔可以錯過喇！開箱之後，由於隻錶本身無晒電，等我即刻幫佢叉一叉先！由完全無電叉到30%電力，都只係用咗15分鐘左右，咁就算瞓覺都戴住隻錶，只要平時去沖涼或者做緊野嘅時候放低叉一陣，就唔怕會唔夠電啦！
今日我就首先試試將佢接駁到我用緊嘅 iPhone先！由於呢隻錶係行自家嘅操作系統，所以接駁之前，要先下載呢個叫Zepp嘅手機應用程式。接駁嘅方式好簡單，只要用程式掃一掃錶面嘅QR Code，跟住手機嘅指示，就順利連接好，連接完仲自動下載埋最新嘅系統更新，跟住入埋自己少少個人身體資料之後，就可以開始用喇！
只要喺手錶嘅表面下方向上掃一掃，就可以見到預設嘅資訊，包括天氣、心率、步數等等，有關顯示嘅項目同埋次序，亦可以自行設定。當然，錶面亦會簡單顯示相關嘅資料。講到錶面，亦可以喺Zepp應用程式入面嘅錶盤商店，揀唔同款嘅錶面設計，亦可以喺App Store或者Google Play 入面搵到第三方應用程式，管理呢款手錶嘅錶面設計！
由於使用自家操作平台嘅關係，Amazfit T-Rex Pro 只可以將手機嘅訊息推送到手錶，暫時未可以回覆短訊，對於習慣咗用穿戴裝置簡單回覆嘅朋友嚟講，絕對有啲唔方便。至於推送嘅內容，就可以透過Zepp程式入面嘅「App通知提醒」揀番，不過要留意，就算揀咗最下面嘅「其他」，上面有顯示嘅程式都要一個一個開番，如果唔係，就一樣睇唔晒所有嘅推送。而無出現喺清單上面嘅程式，就只可以透過下面嘅「其他」去開啟，唔可以獨立操作，呢方面亦為用家帶來少少唔方便。
呢隻手錶支援10ATM、大約100米嘅防水功能，無論日常洗手、甚至浸落水中都唔成問題。正如官方網頁所講，佢通過咗多項軍事級認證，做運動或者日常工作唔小心撞到，以至跌落地，都一樣唔成問題！
呢款智能手錶主打運動功能，入面內置咗過百款嘅運動模式！對於我嚟講，健步應該係用得最多嘅選擇。呢隻手錶可以連接4個唔同嘅GPS衛星定位系統，單靠隻錶本身亦可以快速同埋準確取得定位，戴住做運動嘅路線就一目了然！
提提大家，我手上嘅係國內版本，錶面只會顯示簡體中文字，但訊息推送中嘅繁體、英文以致其他語言顯示就完全無問題，香港行貨就可以選擇以繁體中文、簡體中文以及英文顯示，不過顏色選擇就會較少。另外，呢款手錶係唔支援流動通訊網絡同埋wifi連接，所以手錶一定要接駁電話，先可以有推送同埋同步功能。雖然國內版本係有NFC功能，但係喺香港亦都暫時唔可以使用。
不過以行貨HK$1298或者國內賣緊低於HK$1000嘅價錢，買到呢隻功能多、造功靚嘅智能手錶，其實已經算相當超值！
其他集數
小米 Mi 11i 手機開箱評測 | $4000有找 高性價比玩盡旗艦級處理器
小米降噪耳機 Pro 旗艦登場 | 首款主動降噪耳機 RMB800 有找
Logitech ERGO K860 人體工學無線鍵盤 | 弧形設計減低手部勞損 Easy-Switch隨時切換三部裝置 長用鍵盤人士必備
Amazfit T-Rex Pro 香港開箱！HK$1298 有型抵用 100米防水 簡單配對 軍級防撞
三星 Samsung Galaxy Book Pro Galaxy Book Pro 360 輕巧登場 | Intel Evo 11代處理器 一步分屏連接藍牙裝置 支援S-Pen一機兩用
AirTag Apple物件追蹤器 | 輕鬆追蹤物品實時位置 加密保護位置資訊 NFC顯示物主通知方式
Ipad Pro 2021 M1處理器加持Thunderbolt 快速連接 Liquid Retina XDR屏幕 設計執相剪片一機完成
Filter King Aura Air Multiplier 多功能空氣清新機 開箱評測 | 殺菌小風扇 冷暖兼備 四季必備
