播出日期:13/5/2022
生老病死係人嘅必經階段，面對親人嘅離世，我哋先突然發覺原來要處理嘅事情好多，辦好身後事一啲都唔容易，所以我哋需要一個喪禮統籌嘅角色。
慰心善終服務嘅執行總監鍾家樂先生，喺幫屋企打理咗幾年殯葬相關嘅業務之後，希望為先人家屬提供一站式嘅殯葬服務，所以喺15年開辦咗慰心善終服務。
「一個喪親家庭需要用大量嘅時間，去搜羅唔同嘅用品，包括要搵公司訂購棺木，又要搵唔同公司安排儀式，訂花籃、造壽衣都要個別安排。
見到咁樣嘅情況，我自己都希望提供一個一站式，只要你搵我我就可以安排好晒成個身後事嘅負責人，希望透過自己嘅能力可以幫到呢啲喪親家庭嘅家屬，等佢哋能夠可以整頓好自己嘅情緒。唔駛佢哋辛苦、頻撲，甚至係連辦文件都唔駛佢哋去煩。」除咗想幫到客人之外，鍾家樂原來喺殯葬服務方面再做多少少嘢：「我唔單止係陪伴你同行成件事，由一開始接觸行到去先人入土為安為止，而係一個教育，個意思係話你話俾我知你想點樣做，想咩要宗教儀式，我會由頭解釋俾你知，唔單止係一個宗教上嘅小教育之外，亦都俾你知道每一分每一毫用咗喺咩地方，會有張清單話你知你幫先人買咗個咩棺木，買咗咩壽衣、被及祭品。因為我相信你係好想知道你幫緊離世屋企人做緊啲乜嘢，而唔係交晒俾我去搞。我哋好缺乏嘅一樣嘢就係對呢個行業或者對死亡嘅認識，同埋之後要做啲咩，我哋無機會去理解，所以希望透過自己做緊嘅嘢可以俾多啲人認識，起碼多個知字。」
除咗幫喪親家屬辦理好先人嘅喪事之外，慰心善終服務仲好希望教育大家，預先為自己嘅後事打算：「預早籌備死亡係一件又健康又正面又幫到屋企手嘅嘢嚟，成日都會講第時瞓咩棺才自己都唔知架喇，咁又真係喎用者自用丫嘛。我哋一早去預備呢，咁等到百年歸老嘅時候屋企人無咁徬徨，佢真係知到你想要啲咩嘢想點樣做，甚至你可以預留到一啲經濟上嘅幫助俾後人，對後人嚟講都係好重要嘅幫助同安慰。」
家樂話到而家為止，大約有8-10個人係已經簽咗呢份生前契約，而家樂亦已經試過一次幫一位uncle按佢生前意願完成佢嘅喪禮：「「第一佢屋企人好開通，第二其實uncle久病嘅，佢亦都知道自己可能都差唔多。我呢一世都唔會忘記，佢開始行動不便，我喺一間殯儀館門口等佢，佢嚟到嘅時候好開心『嘩好光猛呀，就呢間啦！』
大約半年後uncle走咗，我同佢個仔直情係無出過嚟開會見面，直到接遺體當日，其實係一種交托，一種安心，我喺佢身上、我喺佢個仔身上好睇到呢樣嘢。」
慰心善終服務
網站：http://peaceofmindfuneral.com/
Facebook：https://www.facebook.com/POMfuneral/
