Z世代達人

播出日期:1/11/2019

早前同大家介紹過性價比超高嘅華為 Nova 5T 手機,今日就收到實機喇,一齊同大家做個開箱!

正如之前所講,華為 Nova 5T 以大約港幣 3000 蚊嘅價位,配備旗艦處理器 Kirin 980、8 GB 記憶體同埋 128GB 內存,絕對係超性價比嘅手機。先睇下個包裝,盒裏面嘅配件一樣咁齊全,除咗主機之外,仲有 SIM 卡針呀,基本透明外殼,Type-C頭嘅耳機,充電線同埋支援華為 Super charge 快充嘅充電插頭。

我揀咗嘅就係蘇音藍呢個顏色,等我爆咗部機先,過程中我再根據提示插入 SIM 卡,雙卡雙待位都支援 NanoSIM,不過就唔支援外置嘅記憶咭。爆好部機之後,第一時間睇睇,兩張 SIM 卡都支援 4G,而且兩張都支援voLTE,配合支援嘅電訊商,有電話入就唔會跌番落3G啦!

聽到華為 Huawei 大家最關心嘅就係 Nova 5T 有冇配備 Google Mobile Service GMS,或者簡單啲講,即係 Google Play。咁你就唔使擔心喇,因為 Nova 5T 發佈嘅時候係禁制令生效之前,所以冇受到呢個禁制令嘅影響,大家照樣可以用 Google Play下載你鍾意嘅手機應用程式。

由於配備左咗頂級嘅處理器,操作 Nova 5T 嘅時候相當暢順,試吓開個瀏覽器睇吓網頁同片先,速度比想像中仲要快,拍得住旗艦手機嘅質素,就算睇新聞報道配合下面嘅資訊列,一樣唔會疾下疾下或者起格,效果相當滿意。

介面方面亦都相當有心思,雖然部機唔算大部,但係都有提供單手操作模式,只要輕輕咁喺畫面底部掃一掃,成個畫面就會縮細,之後單手使用都冇問題啦!而對於成日出 Trip 嘅朋友嚟講,華為手機介面亦都貼心咁提供咗兩張 Sim 卡可以分別開關數據漫遊功能,確保唔會因為撈亂 SIM 卡而要俾昂貴嘅漫遊收費。

好喇,係時候加埋個膠殼出街影吓相先。Nova 5T 配備咗四個唔同功能嘅鏡頭,所以影相有特別多唔同嘅效果選擇。4800 萬像素嘅主鏡同埋 1600 萬像素嘅超廣角鏡影出嚟效果就相當唔錯,雖然冇配備光學變焦鏡頭,但係當我選擇兩倍變焦,影出嚟嘅相一樣冇起格,對於光學變焦冇實際需要或者對相片冇好高要求嘅用戶嚟講,絕對唔使擔心。等我再試吓用佢嘅微距鏡頭影埋兩朵花先!絕對合格啦!除咗鏡頭方面,手機亦都有好多唔同嘅相機情景設定,貫徹華為手機以影相領先嘅優勢。

《Z世代達人》
麥卓華

追蹤我們
公司殊榮
Copyright Claims
Copyright Claims