食玩飛常遊

播出日期:20/1/2020

喇沙、椰漿飯、哇仲有 High Tea 呀...... 但係今日唔係介紹餐廳喎,呢度係邊度嚟嘅呢?
雖然馬航已經唔再提供頭等客機服務,不過只要你係馬航飛行常客嘅最高級別會員,又或者係 OneWorld 寰宇一家聯盟航空公司嘅最高級別,好似我咁呀,係國泰嘅鑽石卡會員,喺飛機起飛之前都可以去吉隆坡國際機場嘅馬航頭等貴賓室等上機。
相比起國泰喺香港嘅頭等貴賓室,馬航呢個提供嘅服務就比較少,不過勝在裝修舒服,環境寧靜。而且餐廳仲有提供好多特色嘅美食。好!等我睇吓餐牌先!嘩!真係樣樣都想試呀!
首先睇吓呢碗檳城嘅阿參喇沙!同我地平時食開咖喱味重嘅喇沙唔同,檳城喇沙味道偏酸,可辣可唔辣,用料都非常豐富,加入咗甘榜魚或者馬鮫魚,口感好正㗎!
等我再試埋佢呢度嘅椰漿飯先!都做到地道嘅味道喎。橫掂仲有時間,等我叫埋個英式 High Tea 慢慢嘆先
餐廳後面就係貴賓室嘅嘅休息大廳,玻璃幕牆可以無阻擋咁睇到機場嘅風景,職員亦都會為你送上飲品同埋小食,而且冇乜人,可以舒舒服服咁等上機。呢度亦都有酒店式嘅淋浴間,你亦都可以喺上機之前,去沖返個靚涼,搭長途機都唔怕黐黐立立啦!

追蹤我們
公司殊榮
Copyright Claims
Copyright Claims