播出日期:17/7/2020
Casio G-Shock系列近期推出咗一系列嘅運動型智能手錶，繼之前介紹過嘅GBD-H1000旗艦系列之後，好多朋友都想知道我手上呢隻 GBD-100 喺功能上有幾大分別呢？今日就同大家睇吓！
GBD-100 可以話係 GBD-H1000 嘅平價版本，兩隻手錶嘅外觀差唔多，不過其實拍埋一齊，就睇到GBD-100比GBD-H1000 明顯細隻啲，戴上手亦輕唔少，對於唔鐘意戴太大隻錶嘅朋友來講，反而會啱心水。
GBD-100 支援連接智能電話，只要下載 G-Shock MOVE app，除咗可以對時之外，當你手機收到推送消息嘅時候，手錶亦都有相關嘅提示，仲可以睇埋部份內容。GBD-100亦有來電提示功能，做緊運動或開緊會就唔洗下下拎部電話出嚟！另外，透過連接手機，戴住GBD100去行山或者健步，都可以有路徑紀錄，喺App入面就睇到相關嘅資料㗎！
GBD100 相較 GBD-H1000 缺少咗心率監測功能，亦無內置嘅GPS，所以如果戴住GBD-100行山想記錄路徑，就一定要黐住部電話先得喇。不過GBD-100都內置咗步數計，配合你輸入嘅個人資料，同埋用G-Shock Move App作一次性嘅調較後，都可以喺獨立運作嘅情況之下粗略估算步行距離同埋消耗左嘅卡路里。
我覺得較為可惜嘅係，GBD-100 無太陽能充電嘅功能，內置電池可以使用2年左右。不過作為智能錶，唔洗下下充電亦不過為一個好處嘅。
Casio G-Shock GBD-100 最大嘅賣點就係HK$1280嘅建議零售價喇！慢慢搵下細舖，隨時唔洗$1000就買到！除咗我手上面嘅白色之外，亦都有深藍同埋全黑嘅顏色選擇。對於想買隻跌得撞得又可以駁電話嘅智能錶來講，GBD-100都係一個啱價嘅選擇！
