播出日期:14/10/2020
Apple蘋果喺香港時間2020年10月14日零晨發佈咗全新嘅iPhone12、iPhone12 Mini、 iPhone12 Pro同埋 iPhone12 Pro Max 4部手機，全新外型加上5G支援，相當吸引。即刻同大家睇下！
iPhone12 系列配置咗全新 A14 Bionic 處理器，外型方面，4款手機都一改iPhone11以至過去幾年沿用嘅圓邊設計，改用類似iPhone4到iPhone5s年代以及新一代iPad Pro同 iPad Air嘅起角邊框，用上咗超級Retina XDR OLED屏幕，大細分別係iPhone 12 Mini嘅 5.4寸、iPhone 12 同 iPhone 12 Pro嘅 6.1寸同埋 iPhone 12 Pro Max嘅 6.7寸。另外，iPhone12系列用咗全新嘅 Ceramic Shield Front Cover 陶瓷晶體護面，令機身硬度大大提高，增強手機嘅抗跌能力，比起之前嘅機種耐跌撞能力提升達4倍之多，而機身厚度亦比上一次iPhone11嘅相應機型薄幾mm，手感更好。
iPhone12 支援 5G連線，根據官方嘅資料，香港賣嘅版本係支援本港全頻5G，不過就只有美國版本有支援當地已推出嘅毫米波mmWave 5G，有啲可惜，不過既然mmWave 5G喺香港未有推出，相信對使用嘅體驗唔會有影響。
iPhone12、iPhone12 Pro同埋 iPhone 12 Pro Max香港版本都支援兩張實體Nano Sim嘅雙卡雙待功能，而iPhone12 Mini就支援Nano Sim加eSim嘅雙卡雙待。今次Apple亦有所改進，香港賣嘅版本終於支援埋LTE Band28即係 700mhz頻段，去到台灣同埋澳洲，離開咗大城市都唔怕失聯喇！
iPhone 12 Mini 同埋 iPhone 12 維持上一代iPhone 11 嘅雙鏡頭設計，包括 1200萬像素嘅廣角同1200萬像素超廣角鏡頭。另外，12 Pro和12 Pro Max用咗更強嘅感光元件，12 Pro同 12 Pro Max設有3個分別係1200萬像素像素嘅廣角、1200萬像素超廣角同1200萬像素長焦鏡頭。iPhone 12 Pro Max嘅長焦鏡頭光圈比iPhone 12 Pro大，iPhone 12 Pro同 12 Pro Max分別支援4倍同埋5倍光學變焦距離，而只計放大部份， 12 Pro 同12 Pro Max 分別支援2倍同埋2.5倍嘅光學變焦。更支援Sensor Shift感應器移動式光學防震功能，喺夜拍表現上比以前提高咗87%，咁喺夜晚影相嗰時就更加sharp更加靚啦 ! 另外，Pro Max同 Pro都有 LIDAR測距感應，令夜晚對焦速度快6倍。
喺拍片方面，12 Pro同 12 Pro Max 更加係全球首部支援 Dolby Vision HDR 影片一站式體驗嘅手機，喺拍攝過程中可以進行實時杜比風格調色。HDR拍片亦由8 bit提升到10 bit，令可以捕捉嘅色彩大大增加。
iPhone 12 系列仍然配置Lightning接口，並唔係傳聞中會改用USB-C接口，不過iPhone12 嘅包裝就唔再附送充電插頭同埋EarPods耳機，只會跟一條TypeC去Lightning嘅充電線。
除咗普通嘅無線充電之外，4款iPhone都支援最新 MagSafe 磁吸式15W無線充電功能。大家只要用 MagSafe 充電線，強大磁力就會吸住部iPhone手機，令充電更加方便。
iPhone 12 Mini 以及 iPhone 12 有黑、白、藍、綠同埋 Product Red 紅色5款顏色，香港賣價分別係HK$5,999同埋 HK$6,799起，有64GB、128GB同埋256GB儲存容量選擇。iPhone 12 Pro 以及 iPhone 12 Pro Max分別有石墨色、銀色、金色同埋太平洋籃色選擇，香港賣價分別係HK$8,499同埋 HK$9,399起，有128GB、256GB同埋512GB儲存容量選擇。
iPhone 12同12 Pro會喺2020年10月16號夜晚8 點接受預訂，10 月23號正式公開發售；而iPhone 12 mini同12 Pro Max 會喺 2020年11月6號夜晚 8 點正式接受預訂， 11月13號正式推出。
其他集數
iPhone12 Pro 到手開箱！ 5G 雙卡得唔得？附香港5G測速
au XR Door - 即玩 AR 帶你遊世界！現實版隨意門 - Staycation Flycation 另類選擇
SoSIM - 50GB數據只需HK$33有無伏？ 3HK x 百佳 顛覆市場 超抵儲值卡月費Plan！附測速
iPhone12 Pro Max、iPhone12 Pro、iPhone 12 同 iPhone12 Mini 殺到！
小米 Mi 10T Lite高性價比5G機登埸！二千中價位買唔買好？
Surface Laptop Go 迎戰高性價比筆電市場！HK$4300 i5 處理器 支援Wi-Fi 6
Chromecast with GoogleTV 開賣！唔洗HK$400 舊電視即時變智能電視
小米 Mi 10T Pro、Mi 10T 登場！頂級配置 144Hz 刷新率 5G支援更多頻？
