播出日期:16/10/2020
儲值卡市場風起雲湧，最近3香港夥拍同系嘅百佳超級市場推出咗震撼價嘅So Sim月費計劃！我哋而家一齊睇下呢張卡有咩特別啦！
SoSIM可以算得上係市面上最平嘅儲值咭，只賣港幣$33。開卡就已經包咗有效期30日嘅 50GB 42mbps限速數據，到量後會降速到128kbps，開卡頭120日更加包多50GB社交數據、每晚23:00-第朝07:00嘅7.2mbps歡樂通宵任用數據，同埋10000分鐘本地通話時間，如果用得晒啲數據，呢個價錢絕對係無懈可擊。
我就搵咗張SoSIM番嚟試下！打開包裝放入手機，基本上唔需要做任何設定，就已經上到網喇。等我搵幾個點同大家測試下速度係點先！以Samsung Galaxy S10+試，速度去到42mbps以上，算足秤！試埋歡樂通宵時段嘅7.2mbps任用數據又點先！測速都去到10mbps，睇YouTube、mytvsuper都一樣唔疾，OK收貨！ 試埋俾唔俾Wi-Fi分享Hotspot先！無論用iPhone定Android手機都一樣無問題㗎！不過呢張卡暫時未支援VoLTE功能，如果上緊網有電話入，就會落番3G。
呢張卡開卡後有效期係120日，不過一開就會扣晒$33面值，要增值先可以喺30日後再開數據計劃。除咗一般嘅數據Plan之外，最吸睛嘅就係$33包30日60GB FUP數據喇，無講錯，再開Plan係多10GB！如果怕用唔晒？ 亦有一個$88包90日 120GB FUP嘅數據計劃！如果你張卡夠錢，30日或以上嘅數據計劃係會自動續期，不過包嘅數據就無得累積帶落下個月用。開卡嘅120日10000分鐘用晒之後，每分鐘通話收費都只係$0.05，你亦可以HK$48買180日 10000分鐘通話、50GB社交數據同歡樂通宵組合，平均一個月都係$8！
唯一唔方便嘅係呢個年代仲要去百佳先買到增值券，唔可以同其他3HK嘅增值券共用。增值券可以喺任何一間百佳系嘅超市Counter買，唔同嘅面值會延長張卡唔同日數嘅有效期，好似$200增值券就可以延張1年有效期，喺指定網站登記埋，仲有額外嘅「易賞錢」送㗎！另外提提你喇，呢張卡暫時唔支援帶Number MNP過台㗎！
如果你每月數據容量大，又唔想上台，又唔介意冇得MNP，呢張卡絕對係超值之選！不過如果你只係想keep Number或者只需要好低嘅數據用量，年卡都仲係較抵嘅選擇！
So Sim可以喺十間指定嘅百佳超級市場買倒，官方表示，將來會擴充到全線分店。
其他集數
iPhone12 Pro 到手開箱！ 5G 雙卡得唔得？附香港5G測速
華為 HUAWEI Mate 40 系列登場 - Mate40 Pro Mate40 Pro+ 10倍光學變焦 + Kirin 9000 5nm處理器頂級配置
au XR Door - 即玩 AR 帶你遊世界！現實版隨意門 - Staycation Flycation 另類選擇
SoSIM - 50GB數據只需HK$33有無伏？ 3HK x 百佳 顛覆市場 超抵儲值卡月費Plan！附測速
iPhone12 Pro Max、iPhone12 Pro、iPhone 12 同 iPhone12 Mini 殺到！
小米 Mi 10T Lite高性價比5G機登埸！二千中價位買唔買好？
Surface Laptop Go 迎戰高性價比筆電市場！HK$4300 i5 處理器 支援Wi-Fi 6
Chromecast with GoogleTV 開賣！唔洗HK$400 舊電視即時變智能電視
