播出日期:27/2/2019
三星在2019年嘅世界流動通訊展 Mobile World Congress (MWC) 前，發佈咗全新嘅旗艦摺合手機 Galaxy Fold，帶來全新嘅手機使用體驗。究竟有乜特別？ 我哋今集就同大家睇下。
呢部摺機嘅內Mon用咗三星自家嘅 Infinity-Flex Dynamic Amoled技術，打開係一個 7.3寸嘅屏幕，中間亦唔會見到接口位，而半後就歸功於外殼入面嘅互鎖齒輪嘅精密鉸鏈，確保摺合同打開都一樣順暢方便。而當部電話摺起嘅時候，就會見到一個前置嘅4.6寸 21:9 Super AMOLED 屏幕。
鏡頭方面，呢部機一共有6個鏡頭，包括後置3個同S10系列相同、分別係1個1600萬像素嘅超廣角鏡頭、同埋兩個1200萬像素嘅標準以及遠攝鏡頭，以及打開後嘅兩個「前置」鏡頭以及一個摺合時嘅前置鏡。無論手機在任何狀態，都一樣可以影到啱心水嘅相片。
三星方面表示，由於採用左新嘅屏幕技術，整體嘅屏幕厚度少咗50%，所以部機感覺上唔會太厚。不過我哋憑肉眼睇，部機摺起時的確比正常嘅電話厚咗唔少。
講返部機嘅配置喇，Galaxy Fold配備左最新嘅高通 S855處理器，配合12GB記憶體同埋512GB內置容量，電量方面，就配合咗2粒2190mAH嘅電池，即共4380mAH嘅電量，對於單日使用都算OK。
有部可以摺嘅手機，軟件當然就要配合到啦。三星強調，Galaxy Fold可以在摺合及打開時無縫交接，即係當你喺用緊外面螢幕睇緊Google Map嘅時候，打開部手機，同一個畫面將會起內置屏幕繼續顯示，而且可以睇得更多，不過都要個App支援先至可以做到。另外，呢部機支援同一個畫面顯示同操作多達3個唔同嘅程式，方便你一邊睇片一邊同唔同嘅人開心chat，用盡呢個7.3寸嘅屏幕。
同S 10系列一樣，呢部機一樣可以作為充電版，為其他無線充電嘅裝置提供電力，睇來呢類設計可能成為將來手機嘅主流。
雖然三星亦有提到，當部機打開嘅時候，可以有個咁大嘅螢幕睇片或者打機，不過以我個人理解，大部份嘅電影、劇集、以致遊戲都係以16:9或者21:9編碼，打開後呢個近乎三比二嘅屏幕，無形中就變咗無用武之地喇。
Galaxy Fold將於2019年4月26日以美金1980元，即大約$15500港幣上市，顏色方面將會有黑、銀、紫籃以及黃色作選擇。接口位嘅顏色亦都可以自由配搭。呢個價錢唔知你又會唔會賣帳呢？
Z世代達人
#galaxy fold #samsung #MWC
