播出日期:15/7/2019
咖哩薄餅、蕉葉飯，你去吉隆坡又有無食過？
唔好以為薄餅淨係喺印度出名喎，其實喺吉隆坡呢度，都有好多鋪頭賣印度薄餅 Roti 個喎。不過作為遊客，見到呢類型嘅地道商店，好多時都怕唔識點樣叫，就唔敢入去食。咁今日就等我同大家分享一下！
今次我叫咗三款薄餅，包括原味、植物牛油味、同埋芝士味。不過其實我就最鍾意食原味喇，因為入邊冇其他嘢，反而就更加鬆化同好食！就咁食就梗係寡咗啲啦，所以一般都會配搭咖喱汁去食，今次我就叫咗咖喱豆汁同埋咖喱羊汁點嚟食喎，你睇吓我食到停唔到口就知有幾好啦！望吓個餐牌一啲都唔貴，每塊印度薄餅都係 $1-$2 馬幣左右，即係港紙大約 $2 到 $4，連埋杯嘢飲都唔使 $10 一餐，抵食到爛啦！
曾幾何時香港都流行過用蕉葉上碟食馬來西亞餐，嚟到吉隆坡又點可以唔搵間試吓呢！其實呢度好多餐廳都有蕉葉飯食，入到嚟坐低服務員就會每人鋪塊蕉葉，隨即就幫你勺埋飯，旁邊仲會俾好多配菜你揀。之後就有好多唔同嘅肉類咖喱俾你選擇，仲有好多款唔同嘅咖喱汁可以揀。我就揀咗咖喱羊同埋咖喱雞喇！不過因為呢度宗教嘅關係，所以呢類型嘅鋪頭係無豬食架！
雖然蕉葉嘅味道唔會影響飯餸，不過食緊嘅時候都會聞到陣陣嘅香味，真係別有一番風味架
