播出日期:29/7/2019
去到日本一樣可以用 Apple Pay 入閘，難唔難搞？一分鐘就搞掂啦！
去日本旅行，大家都會買呢張俗稱西瓜卡嘅 Suica 交通卡。近年已經有流傳，香港版嘅 iPhone 8 或者以上嘅手機用戶可以在喺 Apple Pay 加入呢張交通卡，不過缺點就係要先將自己嘅 Apple ID 所屬地轉做日本先用到。不過近來申請手續就已經簡化咗！我哋一齊睇吓！
只要你係 iPhone 8、iPhone X、iPhone Xs、iPhone Xs Max 或者 iPhone Xr 嘅用戶，去 App Store 下載呢個 Suica 嘅官方應用程式。
之後打開呢個應用程式，揀「Suica 發行」、再揀「Suica 無記名」，之後按右上角嘅「繼續」、揀「同意」、再揀想加入交通卡入面嘅銀碼，用 Apple Pay 入面嘅信用卡俾錢，之後再同意埋條款，呢張虛擬嘅 Suica 卡就成功加入咗 iPhone 喇。
試下用唔用到先！要用呢張 Suica，係唔需要預先打開 Apple Pay 錢包，只要將手機靠近閘機嘅感應器就搞掂，同用真卡無大分別。
入閘之後，手機仲會顯示喺旅途中，資料比用香港嘅 Smart Octopus 仲詳盡細！
買野一樣可以用呢張虛擬嘅 Suica 卡喎！你睇，一「嘟」就搞掂。另外，想查詢番虛擬卡嘅消息記錄同埋搭車記錄，只要打開 Apple Pay 錢包，再揀番 Suica 卡，入到去就清楚見到晒！
而我最鍾意嘅，就係可以用 Apple Pay 免手續費直接幫 Suica 卡增值。好似我咁，入到 Apple Pay 錢包 Suica 卡嘅部份、揀「增值」、再喺預設嘅幾個銀碼入面揀，或者自行輸入你想增值嘅金額、再用Apple Pay入面嘅信用卡俾錢就搞掂！感覺上比香港 Smart Octopus 用信用卡增值方便同快捷喎！
