食玩飛常遊

播出日期:6/1/2020

踏入 2020 年,亞洲萬里通又有新優惠喇喎!今日就同大家睇吓!
亞洲萬里通 Asia Miles 以往只有三年嘅有效期,好多朋友都出現用唔晒或者用唔切嘅情況,官方果然從善如流,由 2020 年嘅 1 月 1 號起,所有新賺取嘅里數都永久有效,聽落好似好着數咁喎,但係又有乜嘢要注意呢?
要確保你賺取嘅里數係永久有效,你必須喺唔多於 18 個月裡面有里數嘅兌換或者使用,舉個例,今日你搭國泰嘅航班賺咗 1000 里,你只要最遲18個月裡面,再搭國泰或者聯營航班、透過銀行或者商戶換分、又或者喺 Asiamiles 網站用里數買嘢,所有 2020 年 1 月 1 號之後賺取到嘅里數都可以永久有效。不過要留意喇,一個唔好彩,你 18 個月都無郁過個戶口,呢啲里數就會歸零!
要確保戶口經常有活動,最好嘅方法,就係透過亞洲萬里通或者國泰航空嘅聯營信用卡,每個月自動轉里數到戶口喇!當然啦,如果你用緊其他銀行嘅信用卡,亦都可以定期用積分兌換里數,確保戶口入邊嘅里數唔會歸零。提提你喇,2019 年 12 月 31 號或以前賺到嘅里數,會按當時嘅 3 年有效期計算。
另外,亞洲萬里通為咗隆重其事,由 2020 年 1 月 1 號到 1 月 31 號,只要透過亞洲萬里通嘅金融夥伴,即係各大銀行嘅信用卡,用積分兌換里數,就可以獲得額外 10% 嘅回贈!不過要留意喎,呢個優惠係要喺推廣期裡面登記。另外,亞洲萬里通同埋國泰航空聯營嘅信用卡, 好似渣打亞洲萬里通萬事達卡同埋美國運通國泰聯營卡系列,都係唔包括喺呢次嘅優惠入邊。

追蹤我們
公司殊榮
Copyright Claims
Copyright Claims