播出日期:4/12/2019
八達通由推出至今，儲值上限一直都係維持喺港幣 $1000。有時買下嘢飲同埋搭車就當然夠用啦，但係有時又真係未必夠用個喎，好似日泊嘅停車場費用咁，泊多幾日都未必夠，所以詢眾要求，八達通由 2019 年 12 月 1 號開始，就提高最高儲值上限到港幣 $3000 喇。
如果你嘅實體八達通卡係喺 2019 年 12 月 1 號之前發出，你有兩種方法提升最高儲值額。你可以去就近嘅八達通服務站，撳一撳個畫面，揀提升儲值限額，跟住拍卡，你張儲值咭嘅儲值上限就成功提升咗喇！
如果你嘅 Android 手機有配備 NFC 同埋安裝咗八達通 App，你亦都可以打開你嘅手機八達通應用程式，喺選單揀管理八達通卡，揀返你要提升嘅嗰張，再揀提升儲值限額，跟住拍埋卡就搞掂！
如果你用緊嘅係三星手機嘅 Smart Octopus 功能，你亦都可以直接喺八達通手機應用程式入邊，揀返提升儲值限額嘅 Banner，之揀 Smart Octopus，再直接揀返提升儲值限額，進行身份認證咁就搞掂哂㗎喇！
