播出日期:6/4/2020
喺呢段抗疫嘅時期，潤肺嘅湯水就最受歡迎喇！今日介紹嘅沙參玉竹海底椰湯，生津益胃、袪濕除燥，做法簡單，我哋一齊睇吓！
首先睇吓今日嘅材料：
沙參 約15克
玉竹 約15克
椰子肉 適量
海底椰 3-4粒
蜜棗 3-4粒
無花果 3-4粒
南北杏 適量
瘦肉 200-300克
紅蘿蔔 1-2個
粟米 1個
薑 2-3片
首先將沙參、玉竹、同埋無花果沖一沖之後，浸水大約 15-20 分鐘，椰子肉、海底椰同埋蜜棗就用清水洗乾淨，備用。紅蘿蔔我就會揀有泥嘅，感覺煲湯會出味一啲。買咗返嚟之後要沖走啲泥，跟住去皮，切走蘿蔔頭尾，跟住再切粒。粟米一樣洗一洗之後就切件。南北杏亦都用清水洗一洗。
瘦肉買咗番嚟之後切細件，跟住就要汆水。汆水最好用凍水落肉，因為熱水落會即時鎖住肉嘅外層，咁樣就辟唔到啲血腥味喇。
跟住就可以將所有嘅材料放入煲入面再加水。我習慣咗煲湯就會凍水落料，一來預水嘅份量準啲，二嚟凍水落料可以俾材料嘅味道釋放出嚟。
之後冚蓋用大火煲，以水滾計大約 30 分鐘，轉細火再煲大約個半鐘。飲之前加鹽調味就完成！
