播出日期:27/4/2020
天氣潮濕，加上個人濕氣重，成日都會周身唔聚財咁嘅。呢個時候就可以煲呢個 赤小豆粉葛豬骨湯 喇。呢個湯清熱祛濕，赤小豆亦都可以健脾解毒，今日就同大家睇吓做法！
我哋先睇吓材料：
粉葛 1 個
紅蘿蔔 1 個
粟米 1 個
豬骨 800 克
赤小豆 1/3 至 半碗
眉豆 1/3 至 半碗
蜜棗 3 - 4 粒
陳皮 1 片
薑 2 - 3 片
材料嘅份量其實都可以按實際情況增減，唔使太過緊張嘅，我哋先處理紅蘿蔔。用清水洗乾淨表面，切頭切尾再去皮，跟住就切細件待用。跟住洗一洗條粟米之後，一樣去頭去尾，搣走包住粟米嘅葉，洗一洗之後切件，待用。
粉葛去街市比較容易買到，用之前要用清水洗乾淨，由於表面比較硬，我就習慣用刀切走表皮，不過因為凹凸不平，好多位都要加幾刀先至整得乾淨嘅。之後將粉葛切成角形細件，放落筲箕入面再用清水洗多次。
赤小豆同埋眉豆就用清水洗一洗之後浸大約10分鐘，蜜棗同埋陳皮用清水洗乾淨，浸一浸陳皮。去開街市就當然可以搵雜貨鋪買呢類嘅食材，不過其實一般超市都有得賣，但係有時就可能會有個別產品缺貨嘅情況喇。
今日我就用咗大約 800 克嘅豬骨，買咗 HK$60 左右。落幾多豬骨或者落其他肉類，其實都可以隨實際嘅情況改變嘅，用豬骨就記得要汆水喇，凍水落肉，開火，一齊再煮熱，咁樣就可以確保血腥味唔會鎖住喺啲肉入面，水滾煮多陣就可以夾走啲豬骨，記得唔好要啲泡喎。
準備好晒啲材料之後就可以落煲，煲湯嘅時間比較耐，想材料出味就加料之後用凍水一齊煲滾。開大火煲，煲滾水起計30分鐘就可以轉細火再煲大約 2.5 - 3 個鐘頭左右。之後開返大火滾起煲湯，再加適量嘅鹽調味，跟住就可以飲得㗎喇！
