播出日期:20/4/2020
今日要介紹呢款滋陰健脾嘅章魚蓮藕豬骨湯俾大家。我哋一齊睇吓材料先：
章魚 1 隻
蓮藕 2 節
蘿蔔 1 個
西施骨 500 克 / 適量
綠豆 1 / 3 - 半碗
蜜棗 3 - 4 粒
陳皮 1 片
薑 2 - 3 片
章魚買咗返嚟之後，我哋可以用食物較剪，將章魚剪為細件，之後用凍滾水浸 15 - 20 分鐘。浸緊章魚嘅時候，我哋就可以先處理其他嘅材料。紅蘿蔔去皮同埋切走頭尾，之後切粒。蓮藕有健脾養胃嘅功效，我哋先去皮，切走頭尾之後再切片。綠豆就要浸一浸水，除咗沖走表面嘅雜質之外，如果見到有綠豆浮起，表示呢啲綠豆冇咁靚，如果介意嘅可以拎走唔要。蜜棗同埋陳皮就用水洗乾淨。
豬骨就要汆水。將豬骨同埋凍水一齊落鑊，滾咗之後再煮大約 5 分鐘就撈起。如果熱水先落豬骨，血水就會鎖住喺豬肉入邊，辟唔走血腥味，所以一般都唔會熱水落嘅。睇返頭先浸緊嘅章魚喇，應該好似咁樣已經軟晒，跟住就可以準備煲湯喇！
將所有材料包括薑片一次過放入煲入邊，之後就加適量嘅水，我就建議大約 12 - 15 碗水左右，不過都要睇返你材料嘅多少同埋煲嘅大細調整，唔可以一本通書睇到老㗎 跟住用大火，煲到滾起計再煲大約 30 分鐘，轉中細火再煲 2 個鐘頭左右，加入適量嘅鹽調味，跟住就飲得㗎喇！
