播出日期:29/4/2020
好多朋友好似我咁樣，屋企有好多毛公仔，不過一諗起要洗就好頭痛喇，因為拎出去洗隨時要幾百蚊一隻，但係最驚嘅就係佢洗到走晒樣。如果屋企都有部洗公仔機，而且仲可以消毒，你話幾好呢！今日就同大家睇吓！
講緊嘅就係呢部三星啱啱喺香港推出嘅 AirDresser 魔衣櫥喇。其實佢係一部蒸氣衣物護理機，除咗洗公仔之外，一般西裝、皮褸、甚至乎T恤都一樣可以㗎喎，不過就等我試吓洗公仔先！
今日呢就試吓洗我手上呢一隻公仔。其實呢隻公仔我記得就已經 13 年前買嘅，所以呢成身都係塵，而且相當之污糟，聞落仲一陣臭味。即管睇吓擺落去洗完之後會變咗乜嘢效果。
呢隻 Size 嘅公仔呢，就啱啱好一個櫃洗一隻，通常洗一次公仔就個零鐘左右，擺落去嘅時候就唔可以掂住牆，如果唔係掂住牆嘅位就洗唔到，你見到宜家咁樣坐法連埋個底其實係空心嘅，應該就洗得最好嘅。跟住就可以 Programme 佢洗喇喎！
我只要撳機上面嘅「Special」、之後揀「Toys」玩具模式，跟住隻公仔就可以嘆下 Spa 喇！
AirDresser 呢部機主要以蒸氣同埋強勁嘅氣流清潔同埋消毒衣物，唔使落任何嘅洗衣粉或者清潔劑，每次最多可以掛 3 - 5 件衫，亦都唔使駁來去水位個喎，下面兩個水格，左面係回收嘅污糟水，右面就只需要注入清水落部機度就可以運作㗎喇！
可能你會話呢部機同科技又有乜嘢關係呢？原來除咗可以喺面板控制部機之外，仲可以將部機用 Wi-Fi 連線到 Samsung 嘅 Smart Things 應用程式，除咗可以控制開關同埋選擇模式之外，更加可以將唔同嘅模式下載到魔衣櫥嘅面板。如果你有唔同嘅衣物要洗，你亦都可以喺度話俾部機知，跟住部機就會幫你選擇最合適嘅操作模式，撳個掣就可以開始㗎喇！
咁部機又嘥唔嘥電呢？Samsung Smart Things 入面一樣有話你知每次用咗多度電，幾蚊洗隻公仔，相信都值回票價！
好多人幾套西裝著成季先洗，有咗呢部機，我就算唔濕水洗，都可以放入去用蒸氣消毒，黃霉天又或者好似而家咁喺疫症期間，就放心好多喇！當我成套西裝掛入去護理嘅時候，褲腳仲可以夾埋呢個配件，經過一輪蒸氣護理，連衫都可以唔使燙呀！
護理完畢之後部機本身同埋你嘅手機都會有提示。
話咁快呢就洗完我啲西裝同埋恤衫喇。即管睇吓係唔係真係唔使燙先！嘩！西裝就好難影到效果，俾件恤衫大家睇吓，真係直晒，頭先影到都仲係起皺，宜家呢件西裝同埋恤衫，拎去返工都無問題，而且仲有一陣香味添！
睇埋先前放入去洗嘅公仔呀，表面無晒塵，亦都無晒臭味，雖然顏色就唔係回復到買嘅時候咁新淨，但係肯定都「後生」咗幾年啦！
AirDresser 魔衣櫥喺指定嘅豐澤同埋百老匯有得訂，訂價係 HK$16990，你又有無興趣呢
《Z世代達人》
麥卓華
其他集數
自由鳥 Birdie 2020 出新 Plan 吸唔吸引？教你變相累積剩餘數據 Data！
HUAWEI P40 Pro 香港開箱實測！率先試高德地圖導航 + HUAWEI AppGallery 用唔用得慣？
HUAWEI P40 Pro 香港開箱實測！ LEICA 超靚鏡頭 + AI 功能完美演繹機皇定義！ AI精彩瞬間 路人消除 反光消除
Samsung AirDresser 三星魔衣櫥智能衣物護理機 - 消毒除臭樣樣得！教你 自家洗公仔！
唔洗簽約 $7.3/月 養號碼 / 低用量一流！IMC Networks 幾十蚊用足一年！ 自由鳥 ClubSIM MO
［附解決辦法］私隱大災難 網站 + App 同 Facebook 打籠通 手機買過乜睇過乜「一覽無遺」
2020 全新 iPhone SE 終於現身！3分鐘懶人包睇晒新機詳情！iPhone8 vs iPhone SE iPhone SE2 iPhone9 iPhoneSE 第二代
未完約想升 5G？香港 3 大 5G 電訊商升級計劃率先睇！3香港 csl 1010 中國移動香港
