播出日期:15/6/2020
湯水食譜 - 今日同大家介紹呢款保健湯水 Chinese Soup - 雪梨雪耳瘦肉湯，清熱滋陰，對氣管問題有相當功效 ，而且方便大家在家煮，一齊睇睇！
清熱滋陰嘅 雪梨瘦肉湯，最啱就係夏天又熱又濕嘅天氣飲用，我哋一齊睇吓材料！
雪梨 4 - 5 個
雪耳 1 球
瘦肉 300 克
南北杏 適量
蜜棗 3 - 4 粒
無花果 適量
雪梨清熱滋陰，養胃生津，對氣管嘅問題有相當嘅功效。買咗返嚟之後嘅雪梨要先去皮，切開之後切走入面嘅果芯，之後切粒就可以。
雪耳要先用溫水浸 25 - 30 分鐘，之後用食物鉸剪，剪走雪耳底部較硬嘅「心」，再用鉸剪剪出一朵朵嘅「雪耳花」，待用。
買到嘅乾無花果要先用水浸 15 - 20 分鐘，南北杏同蜜棗就要用清水洗乾淨。瘦肉我就通常會切開細件，方便之後可以食埋。
準備好材料之後，就可以逐一放落煲入面，之後加入適量嘅清水，再用大火煲、水滾計大約 30 分鐘，之後再轉中細火再煲 1 個鐘頭左右，加入適量嘅鹽調味就可以！
