播出日期:25/5/2020
時下流行天然嘅護膚產品，又要美白又要防敏感，選擇花多眼亂。不過你又知唔知，原來喺屋企，已經可以搵到呢樣零成本嘅天然美白防敏感用品呢？
講緊嘅就係每日洗米用嘅洗米水喇！洗米水係弱酸性，亦都溶解咗少量嘅澱粉質，可以分解油污，甚至淡化色素，絕對係最好嘅天然洗面水！不過由於第一浸可能含有雜質同埋穀殼，最好就倒咗佢唔好要，留返第二浸同埋第三浸就效果最好喇。
洗面嘅時候搵個盆裝起啲洗面水，之後用手將水潑向面部，亦都可以用手掌按摩面部，洗完好快就會覺得塊面冇晒油笠笠嘅感覺，每日咁做，皮膚就更加白滑啦！
