播出日期:18/5/2020
今日介紹嘅佛手瓜栗子瘦肉湯，潤肺健脾，而且有止咳、開胃嘅功效。首先睇睇材料：
佛手瓜 2 - 3 個
栗子 10 -15 粒
紅蘿蔔 1 個
粟米 1 條
瘦肉 300 - 400 克
蜜棗 3 - 4 粒
南北杏 適量
薑片 3 - 4 片
佛手瓜又叫做合掌瓜，有袪風解熱、健脾開胃嘅功效。揀佛手瓜嘅時候最緊要顏色清翠，要嚟煲湯嘅佛手瓜唔使切皮，不過一定要用清水洗乾淨，跟住切粒備用。多食用佛手瓜有擴張血管、利尿排鈉嘅功效，對預防心血管疾病同埋降血壓，都有一定嘅幫助㗎！
超級市場甚至乎街市有時都有呢啲去咗皮嘅栗子賣，返嚟洗一洗就用得！不過如果你搵唔到，就可以買呢啲有殻嘅栗子，返嚟慢慢剝殼切皮。栗子壯腰補腎，不過就唔可以食太多，如果唔係就好容易食滯喇！
紅蘿蔔買返嚟之後用清水洗乾淨，之後切頭切尾，再去皮切粒。粟米洗乾淨之後，一條大約分五至六嚿。今次我就揀咗落瘦肉，貪佢容易處理，用嚟煲湯嘅瘦肉切成細件就可以！你亦都可以落豬骨，不過記得汆水，如果想煲齋湯，唔落瘦肉亦都一樣夠味㗎！
跟住我哋將南北杏同埋蜜棗用清水洗乾淨，之後就可以將材料放入煲入邊，記得加埋薑片，跟住就加入適量嘅清水，用大火煮滾，之後煲 10 至 15 分鐘，再轉文火煲多 1 個鐘左右。煲好之後加入適量嘅鹽調味，跟住就飲得㗎喇！
