播出日期:29/7/2020
生活百科 湯水食譜 - 收到網友嘅訊息，希望可以介紹多啲增強免疫力嘅湯水。今日就同大家介紹呢款紅蘿蔔雪耳螺片湯！首先睇睇材料：港式煲湯 chinese soup recipe
雪耳 1 球
紅蘿蔔 1 - 2 個
螺片 3 - 4 塊
粟米 1 條
南北杏 適量
蜜棗 3 - 4 粒
無花果 4 - 5 粒
豬骨 適量
雪耳補肺益氣，而且蘊含豐富嘅蛋白質同鈣質，價錢亦唔貴。煲湯前用室溫水浸雪耳30分鐘左右，軟身之後就好似我咁，剪走底部深啡色嘅硬物，再將雪耳剪成一朵朵雪耳花。
chinese soup recipe - 螺片亦都含有豐富嘅蛋白質，健脾養胃，提升免疫力。用室溫水將螺片浸軟待用。
無花果用水浸10分鐘左右，蜜棗同埋南北杏就用清水洗乾淨。南杏甜，北杏苦，我通常會以2比1嘅比例落南北杏，等啖湯甜啲。
紅蘿蔔用清水沖走表面嘅泥，切頭切尾，之後刨皮切粒。粟米洗乾淨表面之後切細嚿就可以喇。
豬骨就要先汆水，記得凍水落，確保可以同時飛走豬骨嘅血腥味。
跟住就可以將材料放晒落煲入邊，加多幾片薑，再落清水，之後用大火、水滾計煲30分鐘左右，之後再轉細火煲兩個鐘，加入適量嘅鹽調味，之後就可以飲㗎喇！
