生活部落格

播出日期:20/7/2020

airfryer 氣炸鍋食譜 氣炸鍋燒肉 氣炸鍋燒腩仔 

網上其實都有唔少用氣炸鍋整港式燒肉同港式燒腩仔嘅短片,不過好多朋友都同我講怕煩,唔想疏針,又唔想雪嚿肉幾日,咁仲有無辦法呢?今日就同大家分享一下呢個唔洗疏針,只需要雪過夜嘅氣炸鍋燒肉做法!家常食譜 簡單食譜 氣炸鍋料理

整燒肉可以去肉檔買新鮮嘅豬腩,不過早幾日行開Aeon,發現有呢啲原條嘅急凍豬腩仔賣,即刻買番來試下啦!想食燒肉嘅前一晚,將急凍豬腩仔解凍之後洗乾淨,我發現豬皮都好乾淨,應該就無乜豬毛要處理喇。因為我部氣炸鍋比較細部,所以我就張條豬腩仔一分為二。

跟住就要準備醃料,我落咗兩湯匙嘅生抽、一茶匙玫瑰露酒、一湯匙嘅糖、一到兩個茶匙嘅雞粉、適量嘅胡椒粉、攪勻。

跟住準備一個咁上下大細嘅玻璃容器,鋪上錫紙,之後企身放入豬腩仔,之後搽醃料上去豬腩肉嘅部份,記得唔需要搽到豬皮位。如果你屋企有掃,可以用掃搽,如果唔係好似我咁用匙羹都可以。搽完有多嘅醃料,可以倒埋落去,之後摺起錫紙,好似我咁包住嚿燒肉,跟住用白醋喺豬皮上面搽幾次,再好似我咁搵生果刀喺豬皮表面大力𠝹幾刀,𠝹完就可以放入雪櫃最高一格就最好,但唔好放入冰箱,亦唔使封保鮮紙。建議放大約15-18個鐘就可以喇!

第二日拎番嚿豬腩仔出嚟,睇下我用匙羹敲下塊皮,硬晒!咁無問題喇。放嚿肉喺室溫解凍大約20-30分鐘,之後搽多一兩層白醋喺豬皮上面,俾多5分鐘佢吸收。跟住就喺豬皮上面鋪上粗鹽就可以準備燒喇!

首先放張煮食紙喺氣炸鍋籃入面,跟住將醃好嘅豬腩肉咁樣放入個籃,再放入氣炸鍋,用180度火焗30分鐘左右。好!30分鐘喇!打開氣炸鍋,燒得唔錯!夾起嚿肉,跟住用刀或者匙羹刮走豬皮上面嘅鹽唔要。另外氣炸鍋入面嘅煮食紙應該裝住咗好多油,趁呢個機會換埋佢!小心啲油,好熱㗎!之後放返嚿豬腩仔入去,盡量豬皮向上,用200-220度火,再焗多10分鐘左右。

搞掂!開嚟睇下先,又香又靚!之後可以夾起嚿燒腩仔,攤凍一陣,如果怕油,可以好似我咁將燒好嘅燒肉用廚房紙吸走表面嘅油,跟住切開細份就可以上碟!食得喇!聽下聲都知鬆脆啦!

#氣炸鍋食譜 #氣炸鍋燒肉 #氣炸鍋燒腩仔

追蹤我們
公司殊榮
Copyright Claims
Copyright Claims