播出日期:15/10/2020
有無諗過可以喺屋企用氣炸鍋就整到甜餐包呢？ 今日就同大家介紹呢個簡單嘅做法，一齊睇睇！
首先我哋睇下要用咩材料:
高筋麵粉 250 克
雞蛋 1 隻
砂糖 25 克
酵母 4 克
無鹽牛油 25 克
牛奶 110 毫升
另1隻蛋黃 掃麵包面用
首先將高筋麵粉過一過篩，之後加入砂糖、酵母、雞蛋同埋牛油，再用手或者攪拌棒搓勻，再加入牛奶，用手再搓勻同埋成型。如果想麵包鬆化，可以好似我咁用力搓完之後再掟落容器再搓，大約5-7分鐘就可以。之後用一條濕毛巾蓋住容器面，令麵包粉團保持濕度，大約放1個鐘頭左右發酵。跟住我哋可以用手指撳一撳個麵團，麵團唔會回彈嘅話，即代表發酵成功！
跟住大力用手㩒同搓，將麵粉團入面嘅空氣壓出嚟。跟住我哋可以磅一磅成舊麵粉團嘅重量，再平均分為7-8份，我就揀做6星伴月款嘅餐包，即係一共要7個包，磅好後再搓成餐包嘅球形，再放入牛油紙模入面。搞掂！ 跟住我又成盤放番落去大容量，再用濕毛巾蓋住大約半個鐘，俾麵粉團再發酵。
跟住就可以放落氣炸鍋，用150度火焗10分鐘。之後打開氣炸鍋，用掃喺麵包面薄薄掃一層蛋黃，再放番入氣炸鍋，用140度焗8分鐘，新鮮嘅甜餐包就出爐喇！
賣相就好正喇！試下好唔好食先！ 新鮮出爐嘅麵包，真係好好食。又鬆軟，又香，味道又啱啱好。咁易整，你都試吓！
![[聖誕禮物2020] 仿真指壓按摩不求人！韓國mediness「四手神肩」shiatsu指壓肩頸按摩器 | 迷你雪櫃汽水機 懶人恩物！](https://i1.ytimg.com/vi/vHYOtuTSd4U/mqdefault.jpg)
