播出日期:21/9/2020
月餅做法 材料 、 月餅食譜 | 就快到中秋節啦, 除咗同屋企人去賞月外，不如搞搞新意思，試下自已整中秋傳統月餅，令今個中秋更加有意義同難忘啦 ! 今日教大家整傳統月餅 , 方法簡單，自己係屋企都整到㗎！親子廚房、親子活動 白蓮蓉 奶皇 在家造月餅 homemade mooncake recipe 广式月饼
首先睇睇所需要嘅材料！
餅皮
中筋麺粉 120克
菜油 兩湯匙
鹼水 2克
轉化糖漿 85克
餡料
按口味 可選購
鹹蛋黃、低糖白蓮蓉、奶皇
玫瑰露酒 適量
掃面
蛋黃 1隻
水 少許
50克月餅模 1個
一站式買齊所需材料 - 東源號：http://www.tungyuenho.com.hk/
餡料方面，今日我就揀咗低糖白蓮蓉同埋金沙奶皇蓉兩款現成嘅餡料。超市未必有齊以上咁多種材料，尤其係月餅模同現成餡料，我就揀咗去連續6年榮獲Famous Brands Hong Kong 香港著名品牌嘅東源號買，一站式有齊所有用料，睇下！口味多到數唔晒！唔想舟車勞頓，仲可以上佢哋網站一次過訂曬所有材料，應有盡有，方便快捷 ！
齊料就開工整月餅喇！首先我地要搓月餅皮，將油同鹼水加到轉化糖漿入面，搞拌混合，再加入麺粉，呢個時候記住唔好再用打蛋器，因為麵粉糰會卡喺打蛋器中間，好難攪拌㗎！粉團搓至無一粒粒就可以啦！然後將粉團包住保鮮紙放於室溫大約3個鐘備用。如果係夜晚整，亦都可以放落雪櫃一晚。
今日其中一款會造嘅月餅係蛋黃白蓮蓉，我哋可以先處理鹹蛋黃。將適量嘅玫瑰露酒倒落鹹蛋黃上，跟住喺焗盤上排好，放入已預熱到150度嘅焗爐焗7分鐘就可以拎出嚟，攤凍待用。
新手造月餅，我會見議餅皮同餡比例大約係18克比32克。首先示範下簡單嘅金沙奶皇餡先！由於唔使放蛋黃，只需要量32克嘅金沙奶皇搓圓就可以喇！
跟住到處理有蛋黃嘅餡喇！先量一量鹹蛋黃嘅重量，之後用低糖白蓮蓉補齊到32克，跟住將蓮蓉壓成薄皮，放入鹹蛋黃，慢慢包好，唔夠蓮蓉嘅部份可以用陰力慢慢向上推，之後搓成圓型，待用。
跟住到抖涼咗嘅餅皮喇！量18克嘅餅皮、上下用兩張保鮮紙鋪平，跟住用棍碌成厚薄均勻嘅餅皮。跟住就可以將頭先整好嘅餡料放喺餅皮中間，慢慢包好再收口，唔好心急！之後再搓圓就可以喇！
跟住我哋再篩啲中筋麺粉，將搓好嘅月餅粉團碌一碌中筋麵粉，再放入月餅模入面，一隻手撳實個模，另一隻手大力壓10下左右，再脫模就可以喇！
將月餅排喺焗盤上邊，用噴壺離遠噴幾下，等餅皮唔使太乾。之後放入已預熱到攝氏160度嘅焗爐焗10分鐘。
焗緊嘅時候就可以準備蛋漿。將少少水加入蛋黃入面再攬勻就可以。月餅焗咗10分鐘後，可以拎出嚟，趁熱用掃輕輕咁將蛋漿搽到月餅面嘅花紋位，搽好一次後可以上多一浸，之後放落已預熱到170度嘅焗爐焗多9分鐘。搞掂！簡單又好食嘅傳統月餅出爐喇！
啱啱出爐嘅月餅表面會比較乾，不過放兩三日之後，月餅就會「回油」，睇吓！賣相唔錯㗎！快啲試下啦！祝大家中秋節快樂！
