播出日期:19/2/2021
早前 Nokia 就推出咗 Nokia 8.3 5G 作為佢哋品牌嘅首部 5G 手機，呢部機喺配置上絕對係中高階級別，今日就同大家拎上手試下啦！
Nokia 8.3 5G 採用雙面玻璃機身設計，雖然重大約 227g，但佢有四邊弧形邊緣設計，令佢單手操作起上嚟都算舒服。機身上，佢右側有附設指紋識別器嘅電源制，音量鍵，同一個 5G + 4G 或 MicroSD 卡嘅三選二卡槽，最高支援 512GB MicroSD 卡擴展。而機身下方有充電位，收音mic，同埋久違咗嘅 3.5mm 耳機插槽，左側就有 Google Assistant 專用制。
Nokia 8.3 5G 採用 6.81 吋嘅 PureDisplay FHD+ 開孔螢幕，最高支援120Hz嘅更新率，配備高通嘅 Snapdragon 765G 處理器，內置 8GB RAM 加 128GB 儲存空間。等我哋開條片嚟睇下先！喺 PureDisplay 之下，畫面色彩豐富，亦都有層次感。開埋個新聞資訊節目睇下！喺多行走馬燈嘅情況下，仍然保持無 lag 機，絕對收貨！
呢部機嘅其中一個主打賣點，就係佢嘅蔡司四鏡頭相機，分別由 6,400 萬像素主攝鏡頭、1,200 萬像素超廣角鏡頭、200 萬像素景深及微距鏡頭組成，更加入多種蔡司鏡頭嘅效果，例如各款景深、濾鏡等等。等我哋正常影下相試下先！影嘅相出到嚟，色彩還原度都算高，細節位放大睇亦都唔算太濛，效果唔錯！另外，佢嘅拍片功能除咗可以拍攝 4K 嘅 60fps H-Log 格式影片外，仲會有 10 款由蔡司開發嘅濾鏡，方便用家拍出唔同嘅風格。
再試下個 5G 先，佢支援嘅 5G 頻段有 13 條，比其他同級手機多。喺室內嘅情況下，下載速度都有成 300Mbps，應付日常生活，甚至孚打機睇片都綽綽有餘。
值得一提嘅係，呢部機採用原生 Android 設計，更新後已經可以使用Android 11。而且又承諾支援最少兩年嘅系統更新，同三年嘅系統安全更新。加上 Nokia 喺外國研究機構 Counterpoint Research 嘅手機安全報告入面，連續兩年得到「最獲信任 Android 手機」嘅第一名，值得加分。
電量方面，佢有 4,500 mAh，支援 18w 有線快速充電，就算全日開 5G 都無咩大問題。
呢部 Nokia 8.3 5G 香港已經有售，顏色方面暫時只係推出咗 極夜藍，官方建議零售價係 HKD$4,398，對於注重安全性，又鍾意影相拍片嘅人嚟講，絕對係唔錯嘅選擇。
其他集數
Jabra Elite 85t 開箱評測 | 65t 75t 升級版 內置ANC主動降噪晶片 手機調控降噪及環境聲等級
鴻蒙 來了! 華為 Huawei Mate X2 摺疊形手機登場! 升級改用內摺疊設計 後置 Leica 四鏡頭 仲可以當前置鏡頭自拍
Redmi Note 9T 5G 手機開箱評測 | 入門價錢享有 5G 雙卡雙待 | 4800 萬像素鏡頭拍攝 4K 30fps 影片
Nokia 8.3 5G 開箱評測 | 蔡司四鏡頭拍攝4K 60fps H-Log影片 | Counterpoint最獲信任Android手機第一名
Logitech MX Anywhere 3 最強辦公室滑鼠Mouse 開箱評測！玻璃枱床面梳化一樣用到
Mi 小米手錶運動版開箱評測 特強續航力 追蹤過百種運動功能 輕鬆監測即時身心狀況
2021電子利是大流行？派完有得現金回贈 即教你點派最著數
小米11 Mi11 國際版現身！三鏡頭配 5G 旗艦機
