播出日期:30/6/2021
近年越嚟越多人戴運動型智能錶，坊間嘅選擇五花八門。唔好以為運動錶一定大大隻，今次同大家開箱嘅呢款 Amazfit GTS2 Mini 就照顧左手腕比較細同埋需要輕薄設計嘅朋友需要，男士女士都啱用！今日就同大家做個開箱！
Amazfit GTS2 Mini 以無邊框方型錶面設計，1.55英寸嘅AMOLED顯示配備2.5D曲面玻璃，外型相當討好。重量方面只有19.5克，錶身厚8.95mm，錶嘅背面就係各感測器，加埋原裝配置嘅錶帶，帶上手相當輕巧，做運動嘅時候就更加唔會感覺到阻力。
我哋首先試試將 Amazfit GTS2 Mini 配對到手機。 今次我就揀咗配對到Android手機，首先去Google Play Download 呢款 Zepp 手機應用程式，打開應用程式，新用戶可以做個簡單登記，因為之前我已經用過Amazfit嘅產品，所以我可以直接登入應用程式，之後選擇連接新手錶，掃一掃錶面嘅QR code，配對就會自動完成，而且仲會即時為智能手錶更新軟體，簡單又方便！就算你唔熟IT都一樣搞到㗎！
以手指撥下 Amazfit GTS2 Mini嘅錶面，就可以去到唔同嘅功能表，非常易用，預設嘅錶面顯示出唔同嘅數據，好似步數、心率、電量以至天氣，而且可以直接喺隻錶更改到顯示嘅數據項目，唔一定要駁住電話先改到。唔鍾意用預設嘅錶面，亦可以透過Zepp應用程式下載同轉換，上載埋自己嘅指定相片都可以㗎！
Zepp 應用程式預設咗唔會自動推送電話嘅通知，不過戴得智能錶，應該都想睇下Message同訊息。要開啟推送功能，只需要透過Zepp應用程式設定，手機嘅通知就會推送到Amazfit GTS2 Mini，有來電亦都一樣會收到通知㗎！ 你可以喺錶面直接拒聽來電，不過聽電話就要翻個電話出嚟喇！
戴得智能錶，運動數據絕對係重要嘅功能，就等我試試先！喺陽光之下，錶面都睇得清清楚楚，唔錯！ Amazfit GTS2 Mini 內置咗GPS，就算好似我咁無拎手機做運動，隻錶本身都可以準確定位同紀錄㗎！事後透過手機App睇番運動數據亦都相當詳細，有超過70種唔同嘅運動紀錄模式！結合一般健康數據包括心率、血氧、步數、睡眠等等，演算出PAI健康指數，量化你嘅身體狀況。
另外，Amazfit GTS2 Mini 亦內置咗遙控影相功能，雖然手機宜家都可以自拍，但有時想行遠啲影，又或者一班人合照，呢個功能就發揮到作用！另外，女士使用呢隻Amazfit GTS2 Mini 亦可以配合為女士而設嘅功能，相當貼心！
Amazfit GTS2 Mini 使用磁吸式充電，官方表示充滿電可以正常使用高達14日，就算係重度使用，都有7日嘅電量！喺慳電模式下，仲可以有長達21日嘅電量㗎！
Amazfit GTS2 Mini有黑色、粉色以及綠色3款選擇，喺香港已經有得賣喇！
其他集數
Honor Band 6 開箱評測 | Watch ES 同門師兄弟 屏幕比上代再大一半 極長續航力都只係幾百蚊?
Honor Watch ES 開箱評測 | 高性價比智能手錶 $600都唔駛 健身課程變動畫 跟住做冇難度
黑鯊4 5G 開箱評測 | 小米電競手機 加入實體 L/R 鍵 抵玩過 ASUS ROG Phone?
Amazfit GTS2 Mini 開箱評測 | 媲美Apple Watch內建功能 體積更小 更高性價比 ?
全港首試 AlipayHK x Sino 消費券體驗館 | 熱門打卡推介 即試電子消費券 登記獲取更豐富優惠
小米手環6 開箱評測 | 5 ATM防水 運動健康全天候監察 都唔駛$300
新機開箱 紅米 Redmi Note 10 5G 開箱 發佈現場睇！5G實地測速
Nokia G20 | 唔駛$2000有四鏡頭+雙卡雙待 3日續航力 公司手機/長者小童手機首選
