播出日期:1/7/2021
手機遊戲市場近年不斷擴大，唔少嘅廠商都開始研發同推出各款電競手機，而小米有份注資嘅黑鯊科技早前亦都推出咗新嘅電競手機－黑鯊4，今日就同大家做個開箱睇下！
呢部黑鯊4配備 6.67 吋嘅 Samsung AMOLED 開孔屏幕，支援最高 144Hz 嘅刷新率同 720Hz 嘅觸控採樣率，等用家有更爽快同順暢嘅遊戲體驗。佢採用高通Snapdragon 870處理器，預載基於 Android 11 嘅 JOYUI 12.5 系統，呢個系統用落同 MIUI 相似，分別在於佢加入咗一啲可以加強遊戲體驗嘅介面功能。而且黑鯊4仲加入咗全新一代嘅「三明治」液冷系統，比起上一代嘅黑鯊3提升咗30%嘅散熱能力，咁即使用家長時間玩遊戲，都唔使怕手機會過熱喇！
喺機身上，佢嘅左側設有音量鍵同支援5G + 4G雙卡雙待嘅Sim卡槽，而喺下方就設有3.5mm耳機插頭同Type-C充電口。機身右側方面，佢設有可用於指紋辨識嘅開關鍵，而喺開關鍵兩旁嘅位置，佢加入咗一對使用磁動力開關嘅升降肩鍵，嚟模仿遊戲機手掣嘅L／R鍵，等用家玩遊戲時有更好嘅操控。當用家唔係玩緊遊戲嘅時候，呢兩個肩鍵都可以當成其他功能嘅快捷鍵，認真貼心！
等我哋即刻試下用嚟玩遊戲先！喺咁高刷新率同觸控採樣率之下，玩遊戲嘅感覺的確比起普通手機爽！再試下開多一個有多行走馬燈嘅新聞資訊節目！依然好順暢，無任何lag嘅情況。最後做埋個5G Speedtest！呢個咁快嘅速度絕對足夠應付玩線上遊戲同load片喇！
黑鯊4除咗玩遊戲出色之外，佢嘅鏡頭都唔差架喎！佢擁有2000萬像素嘅前置鏡頭，而後置三鏡頭就由4800萬像素主鏡頭、800萬像素超廣角鏡頭同500萬像素微距鏡頭組成。大家睇下影出嚟嘅相！絕對唔錯架！
呢部黑鯊4有4500mAh嘅電量，支援最高120W快速充電，就算玩啲高耗電量嘅遊戲，都唔使驚好快會無電同充電時間耐喇！
黑鯊4喺香港已經正式發售，8GB RAM + 128GB內置儲存空間版本賣HK$3,798，而12GB RAM + 256GB內置儲存空間版本賣HK$4,698，有幻境黑同凌光灰兩種顏色選擇。
其他集數
Nokia XR20 三防5G手機 | 軍規防護認證 IP68 防塵防水 耐用度極高
Honor Band 6 開箱評測 | Watch ES 同門師兄弟 屏幕比上代再大一半 極長續航力都只係幾百蚊?
Honor Watch ES 開箱評測 | 高性價比智能手錶 $600都唔駛 健身課程變動畫 跟住做冇難度
黑鯊4 5G 開箱評測 | 小米電競手機 加入實體 L/R 鍵 抵玩過 ASUS ROG Phone?
Amazfit GTS2 Mini 開箱評測 | 媲美Apple Watch內建功能 體積更小 更高性價比 ?
全港首試 AlipayHK x Sino 消費券體驗館 | 熱門打卡推介 即試電子消費券 登記獲取更豐富優惠
小米手環6 開箱評測 | 5 ATM防水 運動健康全天候監察 都唔駛$300
新機開箱 紅米 Redmi Note 10 5G 開箱 發佈現場睇！5G實地測速
