播出日期:12/9/2018
時下新一代嘅大忙人都會好似我咁，時不時都不在辦公室，但又有需要Remote番去自己部電腦睇野又或者搵資料。好多朋友都會選擇用TeamViewer。不過 Teamviewer 商用版其實係要收取月費嘅，想要免費嘅選擇？ 等我同大家介紹下啦！
今日要介紹嘅，就係由Google官方推出嘅 Chrome Remote Desktop軟件。好多朋友都會誤會，呢個軟件係要在ChromeOS平台或者要開住個Chrome瀏覽器先用到，但其實佢係一個可用於Windows平台嘅獨立程式，而且完全免費！
如果你電腦未有安裝 Google Chrome 瀏覽器，你要去 chrome.com 下載同安裝。之後用Chrome 去網址 remotedesktop.google.com。來到呢個網頁之後，選擇右上角嘅 Remote Access，之後選擇右下角嘅「下載」選項，Chrome就會問多你一次係唔係要新增「Chrome Remote Desktop」，揀「新增擴充功能」、之後就會下載一個安裝檔案，下載完之後再揀「Accept & Install」，之後就會自動完成安裝嘅程序。安裝好之後，你只要輸入番你嘅電腦名，再揀一個6位以上嘅數字密碼，設定就完成喇！
咁點樣可以在其他地方都控制到呢部電腦呢？首先在其他電腦打開Chrome，之後再去番 remotedesktop.google.com，再揀番「Remote Access」，再用你嘅Google Account登入，就可以見到你有上線嘅電腦。再按入去，輸入番之前設定嘅PIN，就會出現遠端電腦嘅畫面！另外，Chrome Remote Desktop 亦有提供俾 iOS同埋 Android平台用嘅版本，只要下載相關嘅流動應用程式就可以用喇！
除咗自己嘅電腦之外，有時你亦可能有需要幫朋友整下電腦，下下用自己Google Account Login就有D唔太方便。其實只要你朋友部機有安裝 Chrome Remote Desktop，佢可以去番 remotedesktop.google.com，揀 Remote Support，之後揀番 Get Support入面嘅 Generate Code、就會有一組12位數字嘅號碼出現。你就可以用呢組號碼，在你電腦嘅 Remote Support 、Give Support 一欄入番呢12位數字，就可以登入朋友電腦喇！
最後提提大家，除非你在你嘅路由器做咗特別嘅Port Forward設定，如果唔係，你嘅電腦都要長開住，同埋記得要揀番唔會自動休眠！如果唔係，就算你已經設定好晒，出咗街都一樣Remote唔到番來自己部電腦架！
