播出日期:20/9/2018
有時我地要過錢俾朋友，或者在網上買咗嘢要Bank-In錢俾賣家，好多時都會出現大家用唔同銀行嘅情況。成日要過數嘅朋友可能會在唔同銀行都有戶口，但一般用戶通常都只會用一、兩間銀行，要即時做到跨行轉帳，唯有去相關銀行排隊入數。不過隨著各大銀行推出「快速支付」服務，呢個唔方便嘅情況可能會改寫。
由2018年9月17日起，參與嘅銀行就會俾各用戶登記呢個服務，9月30日就可以正式使用。可能你會話，點解要登記呢？原來呢個服務嘅特點就係除咗可以用傳統嘅戶口號碼做轉賑之外，你仲可以用收款人嘅電郵又或者電話號碼做轉帳，更加人性化又唔會咁易出錯，而收款嘅一方只要係用緊參與銀行嘅戶口，無論任何時間，都可以即時收到相關嘅款項。
好喇，咁可以點登記呢？ 今日我就試下分別用兩間唔同嘅銀行示範俾大家睇下。如果你有用開手機銀行或網上理財服務，其實銀行已經有你嘅手機同電郵資料，所以你只要確認一次，同埋輸入番你嘅密碼做認證，成個過程就完成！9月30日之後朋友就可以透過你嘅手機號碼或者電郵過錢俾你喇！
另外，呢個服務亦都支援香港市面10款唔同嘅手機錢包，以後就唔駛怕大家用唔同嘅手機錢包或者銀行，都一樣可以即時過數啦！
不過留意喇，每個手機號碼係可以綁定多於一間銀行或者手機錢包，不過你就要選擇其中一間銀行或者其中一個手機錢包作為預設嘅戶口喇！服務開通後，操作方式又係點？ 到時我地會同大家跟進！
《Z世代達人》
麥卓華
