Z世代達人

播出日期:12/10/2018

之前我哋都有介紹過,iPhone XS Max同iPhone Xr 在香港、澳門同中國內地賣嘅係真雙卡嘅版本,唔少打算今年唔換電話嘅朋友,都因為呢個等咗好耐嘅功能而改變主義。咁究竟iPhone呢個「第一代」雙卡嘅體驗又係點呢? 今日就同大家試真啲!
 
要入兩張SIM卡,同一般Android手機都幾唔同,因為通常Android手機兩個卡槽都係分開嘅,但iPhone嘅兩張卡,就用上咗前後置嘅設計,確實可以慳翻手機嘅位置,亦令呢部真雙卡手機同使用eSIM技術嘅版本外觀一致。不過當我初初將放晒兩張SIM卡嘅卡槽放翻入部機嘅時候,其實都有啲唔太習慣,怕向後面那張SIM會跌出來,相信都要一段時間先可以適應喇。入咗兩張SIM卡,之後介面就會顯示兩個唔同嘅訊號同埋強弱,另外,如果你唔鐘意佢預設嘅SIM卡名,亦可以好似我咁自行輸入!你亦可以在設定介面入面,揀番用邊一張卡做語音、邊張做數據,非常簡單。 今次我一個人快閃台北,就即管試下唔用Wifi蛋,直接插張卡落後面嘅卡槽。飛機到咗台北後,熄番飛行模式,入設定揀番用呢張卡行數據… 睇下,已經可以上到網喇!
 
另一方面,我亦都測試咗呢部機行雙卡嘅實際運作情況。舉個例,我將平時用開嘅卡放咗在向機面嘅卡槽,另一張卡就放在向機背一面,而數據就用緊向機面嘅卡。呢個時候,我哋係可以不斷上網,完全無問題喇。但係如果當向機背一面嘅SIM收到電話,我再嘗試用部機上網,係完全上唔到! 要等到電話講完,上網先回復翻正常。由以上嘅測試睇到,雖然 iPhone Xs Max 係支援雙卡雙待,但原來只係支援單通,即係一張SIM卡接通咗語音之後,另一張SIM卡係會暫時停止運作架!
 
我哋亦都發現,原來只有向螢幕一邊嘅SIM卡先可以設定係唔係使用VoLTE功能,而在面向機底一邊嘅設定係會無咗呢個選項架! 唔信?好,我將兩張SIM卡調轉,再睇下,情況都係一樣。呢個分主副SIM嘅情況,將來唔知可唔可以透過軟件更新去變成雙VoLTE嘅手機喇!
 
新一代嘅 iPhone Xs系列除咗操作更暢順之外,更支援每秒1000Mb嘅理論下載速度,咁對比上一代 iPhone X,部機上網又係唔係真係快咗呢? 呢刻身處尖沙咀嘅我,就分別用咗Speedtest同埋香港Ofca嘅手機應用程式做測速。下載方面,兩個測試都睇到新一代Xs系列有好輕微嘅優勢,上載方面,就真係快咗好多喇! 
 
《Z世代達人》
麥卓華

追蹤我們
公司殊榮
Copyright Claims
Copyright Claims