播出日期:19/10/2018
相信大家都認同Whatsapp已是生活嘅「必需品」，無論公事私事我哋都會用Whatsapp溝通。雖然Whatsapp要用電話短訊作認證，好似比較安全，但其實只要我哋一個不留神，騙徒要盜用我哋嘅Whatsapp戶口行騙都唔太難！我哋今日就同大家睇清睇楚！
騙徒首先會嘗試在佢哋自己部手機啟動你嘅電話號碼，方法亦只有一個，就係要收到由Whtasapp系統發出來嘅驗證碼。因為SMS驗證碼係唔可以自動轉發，所以基本上只有你本人先會收到，咁騙徒又點可能會有呢？ 但好多時，你係會好唔清醒咁樣將呢個驗證碼交出來！點解？
當你個電話號碼成為咗騙徒嘅目標後，你會在無要求嘅情況下，收到由系統發出嘅驗證碼，好多人以為，按入呢條Link之後就會「中招」，但其實呢條Link只係方便你在自己部電話入面做認證，唔會有事。但好多人收到呢個訊息之後，個心就會亂咗一亂，在呢個時候，你就會收到另一個由騙徒發出嘅Whatsapp 訊息，入面會同你講，你嘅號碼被人盜用，如果要確認你係戶口持有人，就要輸入剛才收到嘅驗證碼之類。聽落的確好合理，受害人通常就會在呢個時侯交出驗證碼，你個Whatsapp之後就會在短時間內被盜用。通常被盜用之後，你嘅朋友就會開始收到要求買點數或者借錢之類嘅訊息，甚至成為騙徒下一個目標。
咁你明晒點解會中招，有乜方法可以自保呢？首先，你應該在Whatsapp入面設定雙重認證功能，方法好簡單，你可以去「設定」、「帳號」、「雙部驟驗證」、「啟用」，再輸入一個6位數嘅密碼，咁以後除咗驗證碼之外，你就同時要用埋呢個密碼先可以在另一部裝置上啟用到你嘅Whatsapp戶口。 不過，其實最緊要嘅，都係唔好在任何即時訊息平台、電郵或者網頁上透露你嘅密碼或者收到嘅驗證碼，咁樣先可以完全確保到你戶口嘅安全！呢兩個貼士希望可以幫到你啦！
《Z世代達人》
麥卓華
