播出日期:24/10/2018
小米同埋旗下紅米系列嘅手機一向都以性價比高為賣點，在手機界嘅市佔率亦不斷上升。為咗開拓高端用戶嘅市場，小米近來又推出全新品牌 Pocophone，今日就同大家介紹呢部 Pocophone F1。
Pocophone打著高端同性價比高嘅旗號，呢部F1嘅包裝一啲都唔花巧，除咗手機、亦包括充電線、支援快充嘅充電器同埋Sim針，硬件方面採用旗艦級高通嘅S845 晶片，同一系列旗艦機好似Samsung Galaxy Note9、Google Pixel3 等等睇齊，配個6GB 記憶體同埋 128GB嘅內置儲存空間，仲有最新嘅水冷技術，以$2799嘅售價，數據上絕對係最超值嘅旗艦級手機。咁實際又係唔係咁呢？
先睇下評分軟件嘅跑分先。我地用安免兔來做測試，硬件評分有成廿六萬幾，算係好高嘅分數。咁同其他Android機相比又係點呢？原來同其他市面上同期手機比較，Pocophone F1 都算名列前矛，效能同Samsung Galaxy 9系列相約！
再試下手機上網嘅表現先。我哋拎埋都係用S845晶片嘅Samsung Galaxy S9 做個網速測試，無論我哋用 Speedtest定OFCA嘅手機應用程式做測試，都見到S9嘅上網速度比Pocophone快好多，原因係S9系列用嘅Modem嘅LTE級別較高同埋支援CA即係 Carrier Aggregation，所以就有呢個明顯嘅分別喇。
呢部機亦支援前置人臉解鎖功能，同之前嘅紅米一樣，所謂嘅登記其實都係同影張相分別不大，之後雖然可以成功解鎖，不過感覺上又真係無Iphone系列嘅FaceID咁安全喇！
試埋相機先。介面有啲似 iOS嘅影相介面，影相嘅時候反應算唔錯，睇埋張相先！ 顏色都算分明，問題不大！
以$2799呢個價錢，呢部機絕對超值！
《Z世代達人》
麥卓華
