播出日期:18/1/2019
喺現今嘅Z世代，環保同方便都係同樣重要。有時我哋飲完膠樽飲品後，想搵地方回收膠樽都好困難，有時搵到地方回收，但好似要等登行過去呢又唔係幾著數咁，所以今日嘅介紹就可能幫到你喇。
講緊嘅就係呢部Carbon Coins 膠樽回收機喇。呢部機非常易用，首先你要下載佢哋嘅流動應用程式，同埋登記使用服務。之後按「開始」、再掃描你手上膠樽嘅條碼，系統就會識別呢個樽可唔可以回收，如果無問題，你就可以按指示將膠樽放落右面嘅回收筒，如果多個一個膠樽，就重覆呢個步驟。由於呢個服務剛剛推出，有部份水貨或者入口產品未必有條碼資料，暫時就回收唔到呢類貨品。
當放晒所有膠樽落回收機之後，只要按機上面嘅「完成」掣，系統就會提示你掃描你嘅會員QRCode，咁就搞掂晒！系統仲會即時將積分加入你嘅戶口入面，只要儲夠指定積分，你就可以換拎禮物同埋現金券！
回收番來嘅膠樽，將會以認證嘅標準，先行清洗消毒、再碎成碎片、融化成顆粒、拉絲成紗線、最後製成環保織品。
全港現時大約有十幾部carbon coins回收機，包括在屯門市廣場、荃新天地、數碼港、藍灣廣場同埋利東街等等。
以後如果有膠樽，就不妨先行分類處理，再將呢D膠樽帶到呢部機回收，為環保盡一分力之餘，仲可以賺積分換禮物、一舉兩得！
