播出日期:8/2/2019
唔知大家知唔知，除咗iPhone XS 之外，其實新一代嘅 iPad Pro 11寸同12.9寸版，都一樣內置咗eSIM功能。好多人都以為eSim只係取代咗張實體Sim卡，但其實如果好好利用，有eSIM嘅手機同平板在漫遊方面會方便好多！今日同大家一齊睇下！
我哋上台嘅SIM卡一般嘅數據漫遊日費計劃都比儲值咭貴，不過勝在唔駛換卡。但各網絡商亦都睇準左eSIM漫遊呢個市場，推出漫遊嘅儲值eSIM。好似今日介紹呢張由3香港推出嘅日費eSIM，就最啱用量唔多，又貪方便嘅朋友仔喇。呢張卡賣港幣138蚊包10日漫遊數據，只要上佢哋嘅網頁用信用卡俾錢，完成交易之後，5分鐘內就會收到啟動QR Code嘅電郵。
之後去「設定」、「流動網絡」、「新增流動網絡計劃」、跟住就掃描頭先收到嘅QR Code、好快、呢張eSIM就已經安裝好可以用喇！記住揀番用呢張卡行數據，之後開埋數據漫遊，咁去到目的地，就即刻可以上到網！$138包10日漫遊數據即係平均$13.8一日，價錢相當合理，而且唔駛一次過連續用，用一日計一日，支援包括大部份東南亞地區以及美國、加拿大、澳洲同埋部分歐洲地區。提提你喇，每日以香港時間0:00到晚上11:59計算，每日過咗500mb用量就會限速，所以用來睇片呢張卡就唔岩用喇。張卡啟用後，日費有效期係90日，不過只要你在有效期前上網加購日費用量，張卡嘅有效期就會連同之前未用晒嘅日數延長90日，就咁用$15買一日，或者$138買10日都得架！
如果你覺得一次過俾$138買10日日費貴、你亦可以選擇The Club嘅eSIM。呢張卡申請完全唔駛錢，只要好似我咁上網申請後，就會收到啟動QR Code，做法同頭先一樣。ClubSim嘅日費計劃由$15一日起，不過歐洲同美洲就要$68/日，比3香港貴，不過勝在覆蓋地區較多。
不過，既然部iPad Pro可以儲存最多8張eSIM，裝埋呢張Club SIM又無妨啊！因為可以自己隨時選擇用邊張SIM上網！
Z世代達人
麥卓華
