播出日期:1/2/2019
之前好多人都話呢，八達通卡斷咗香港嘅交通支付市場，不過由2019年開始，可能呢個情況就會有變喇，因為香港支付寶正式殺入呢個交通支付市場，點用法呢？今日同大家睇睇！
要用呢個服務，首先你要有支付寶香港嘅帳戶，同埋更新到最新嘅版本。之後打開支付寶香港手機應用程式，之後可以去「付款」入面，「易乘碼」嘅選項，又或者直接在主頁揀 「易乘碼」 ，之後可以按「立即啟用」，再輸入你嘅支付密碼，就成功啟動呢個「易乘碼」功能！
好多人會好奇，係唔係一定要上到網先可以用到呢個功能！支付實香港強調，「易乘碼」可以離線完成交易，咁就要試下喇！首先我開咗飛行模式，之後再打開支付寶香港嘅「易乘碼」，上車試下先… 得咗！ 由於裝在車上嘅QRCode 掃瞄器比一般用嘅大同靈敏，所以今次嘟QRCode唔駛好似平時在快餐店用咁掃來掃去，體驗亦同用八達通差唔多。上咗車，當我打開番行動數據之後，$9.90 嘅車費就即時會在電子錢包中扣除，收費詳情亦都可以在乘車紀錄一欄裡面搵到。
現時只有呢條由中環交易廣場開去碧瑤灣嘅8X線專線小巴用到呢個服務，不過在今年內，將會有大約90條專線小巴路線可以支援「易乘碼」。不過要留意嘅係，暫時「易乘碼」唔支援轉乘優惠同埋某啲收費嘅選擇，如果你嘅車程有包括呢類收費或者優惠，就暫時唔好用住喇！
Z世代達人
麥卓華
