播出日期:24/4/2019
大家每次喺港鐵入閘都係爭分奪秒，喺香港，大家都會拍八達通卡，不過而家手機付流行，好多人都問幾時先可以用手機入閘？香港未得，但新加坡呢度就已經可以喇，一齊同大家睇下！
由2019年4月開始，新加坡嘅捷運同埋巴士都會接受以輕觸式Mastercard付款，手機錢包好似Apple Pay、Samsung Pay同埋 Google Pay 只要綁定 Mastercard都一樣可以架！要用呢個服務，唔需要事先申請，只要喺過閘時用信用卡或者打開手機錢包，就可以同用當地嘅交通卡一樣，即時入閘。
我就當然要試下啦！開咗Apple Pay之後行埋閘機，拎部電話嘟一嘟，閘門就馬上打開，而畫面就會顯示「Bank Card Usage」。由於我係第一次使用，Apple Pay喺電話顯示拎咗S$0.1授權，相信就係要檢查一下我張卡係唔係用到，如果唔得就應該唔會俾我出閘喇！
可以做到同用交通卡一樣嘅速度，我嘅信用卡亦無喺出閘時即時過數，相信同背後用咗離線後付嘅方式有關。我最欣賞嘅係呢個服務可以接受全球所有Mastercard，亦唔需要預先登記，2019年底仲會支援更多卡種，對遊客就更加方便，以後就唔駛買當地嘅交通卡又或者排隊買單程票啦！ 唔知香港又幾時先有得用呢？
《Z世代達人》
麥卓華
![小米 Airdots 青春版 藍牙耳機 [2019] - 香港開箱！](https://i1.ytimg.com/vi/zcx64SFBwGg/mqdefault.jpg)
