播出日期:8/5/2019
香港人越嚟越鍾意利用週末同埋長假期去旅行，機不離手嘅我哋又點可以上唔到網呢？市面上外遊數據Sim卡五花八門，近來又有一款全新嘅產品「Simplifly」推出市場。我就搵到一張返嚟，一齊試下！
今次呢張SIM卡係喺 Simplifly 官網申請免費試用嘅，雖然我一蚊都無俾過，但係呢張咭已經內置咗HK$50，可以購買唔同嘅海外數據組合。
好，等我開咗張卡嚟用先。我根據說明書上面嘅指示，放張Sim卡落去我部手機入邊，再打指定嘅號碼，唔使一陣我就收到張卡開通咗嘅短訊，確認我可以用呢張咭嚟上網喇
之後就要喺手機下載 Simplifly 手機應用程式，輸入啱啱收到嘅電話號碼，同埋我張Sim卡嘅序號，連埋我嘅個人資料，就可以登入呢個程式。之後去到數據組合一欄，
可以見到大部份熱門嘅旅遊地區都有唔同嘅日數組合選擇。以台灣為例，呢張咭就提供咗三日、五日、同埋七日嘅選項，平均每日都係港幣$10。價就好平喇，試埋個表現先。
我上機前就買咗三日嘅台灣數據。當飛機到咗台灣之後，我就開機試下用唔用到。大約2分鐘左右手機就收到訊號，而且顯示上到網，過程都算順利。試吓個速度先，下載大約有2MB左右、上載就唔太理想，
整體表現冇一般上網卡咁快，不過我哋試過用嚟睇網頁同埋發訊息，基本上都冇大問題，睇片就要Load耐少少，不過勉強都可以睇到。總括講一句，如果你只係一般用途同埋希望平平哋上到網，Simplifly應該可以滿足到你。
呢張卡應該用咗Cloud Sim技術，因為我發現我部機並冇開啟漫遊數據功能，拎到嘅IP亦都係台灣當地嘅IP，相信呢類型嘅SIM卡服務喺未來嘅日子將會更加普及。
《Z世代達人》
麥卓華
