Z世代達人

播出日期:24/5/2019

宜家乜嘢都要講智能,除咗你嘅手機之外,如果你嘅手機地圖可以放上部車上面嘅畫面你話幾方便呢。Apple 早前就推出 Carplay Service,不過香港就比較少車可以對,今日咁岩來到澳洲,我租嘅呢部車就對到,即管同大家玩下!

雖然 Carplay 支援以藍芽同汽車音響組合連線,但係呢程長途車要揸成8個鐘,既然都要插住充電,咁不如直接用USB連線。當手機插入專為 CarPlay 而設嘅 USB Port 之後,手機會全螢幕出現 CarPlay 嘅字樣,汽車上面嘅畫面就會多咗 CarPlay 嘅選項。

撳入 CarPlay 之後,會見到唔同嘅應用程式,其實同一般汽車音響組合差唔多,不過好處就係可以播放你手機入面嘅音樂庫,另外,CarPlay亦都支援播放 Podcast,有音樂、有 Talkshow,揸長途車都唔怕啦!

CarPlay 主打嘅就當然係導航嘅功能。不過原來 CarPlay 唔一定要用 Apple 內置嘅地圖,我哋可以選擇用 Google Maps 做導航。除咗可以用手機輸入目的地或者揀我哋預設咗嘅位置之外,當你揸緊車嘅時候唔方便打字,一樣可以用語音搵到想去嘅地方。

跟住就會出咗附近嘅 Coles 超級市場俾我揀,之後確認埋,導航就可以隨時開始喇!由於畫面比一般電話大,所以資料嘅顯示亦都比較清晰,揸車就自然舒服啲啦!

另外由於主要嘅地圖已經喺車上面嘅畫面顯示咗,手機就會同時顯示行車路線嘅資料,等司機停燈位嘅時候可以睇到嚟緊幾個街口要點行,都相當貼心㗎!

返緊屋企嘅時候,想 send 個 WhatsApp 屋企人知,又得唔得呢?等我喺 CarPlay 開個 WhatsApp 應用程式先!

睇埋個message真係相當準確㗎!

唔想 send WhatsApp,一樣可以打電話喎!好喇,我就到站喇!想知道香港有乜嘢車出廠嘅時候已經支援 CarPlay,可以去以下嘅蘋果官方網站睇到。 

https://www.apple.com/hk/ios/carplay/available-models/ 

《Z世代達人》
麥卓華

追蹤我們
公司殊榮
Copyright Claims
Copyright Claims