播出日期:10/5/2019
雖然新一代嘅手機通常都配備咗比較大嘅內置電池，但係，手機電力又邊個會嫌多？如果你打開你手機嘅電力設定，唔難發現其中一個用電最多嘅元兇，就係你同我都成日都上嘅 Facebook 喇。有冇計呢？
原來 Facebook 為咗加快你打開手機應用程式之後嘅瀏覽速度，預設咗背景更新嘅功能，即係就算你無打開應用程式，佢都會定時更新同埋下載部份內容，咁即係用緊你嘅電力啦
其實而家網絡速度咁快，預先下載定真係冇呢個需要，不如睇吓點樣熄咗呢個功能啦！
iPhone 嘅用戶可以去「設定」、「一般」、「背景App重新整理」、搵番 Facebook 一行、再熄番個設定就可以停止 Facebook 喺無開 App嘅情況之下更新。
Android 嘅用戶，以 Samsung 介面為例，可以去「設定」、「應用程式」、搵番 Facebook 再按入去、再揀「電量」、再熄咗「允許背景活動」就搞掂。
由於推送通知喺大部份嘅情況下唔算係「背景活動」，所以就算做咗以上設定，都唔會影響你收到即時通知架！
《Z世代達人》
麥卓華
