播出日期:28/8/2019
嘩嘩嘩… 排咁長龍，呢檔炒貴刁真係咁好食？
今日同你嚟到新加坡嘅小販市場，見識吓呢間被譽為全新加坡最好食嘅炒貴刁 - 「18炒粿條麵」。原來粿條先係「貴刁」嘅正名，源於閩南，粿條嘅閩南話讀音就同貴刁差唔多，叫下叫下香港人就鍾意叫佢做貴刁喇。
呢間「18炒粿條麵」來頭一啲都唔細，睇吓佢哋鋪頭貼滿大大小小嘅獎狀同埋報紙嘅報導，原來新加坡總理李顯龍都有嚟幫襯佢哋！
其中一個令到呢碟貴刁咁好食嘅原因，就係老闆咁多年都堅持一碟一碟炒，確保食材、調味、份量同埋火候都啱啱好，所以無論你食辣定唔食辣，只要同老闆講聲就得㗎喇！炒好、上碟、搞掂！
睇下有乜嘢用料先，呢碟炒貴刁加入咗臘腸、魚片、芽菜、蜆等等，配合新加坡地道嘅醬油膏一齊炒，夠晒鑊氣啦，睇我食得咁滋味就知道好食到不得了啦！
「18炒粿條麵」位於市中心附近嘅「Zion Riverside Food Centre」，雖然未有捷運可以直接嚟到，不過你都可以搭巴士或者的士去「Great World City」商場對面就係！
