播出日期:4/5/2020
有觀眾問可唔可以介紹多啲有益嘅滾湯，因為放工返屋企先再煲湯未必夠時間。今日就同大家介紹呢款簡單嘅 蕃茄薯仔湯。咁簡單嘅滾湯，原來都有少少秘訣㗎！睇睇材料先！
蕃茄 5 - 6 個
薯仔 1 - 2 個
瘦肉 200 - 300 克
薑片 2 - 3 片
蕃茄營養豐富，可以抗氧化，對於好多心血管毛病都有療效。買返嚟嘅蕃茄要先洗乾淨，跟住就切粒，滾湯用嘅蕃茄最好切細粒，方便出味同埋煮溶。有啲朋友可能會鍾意去咗表面層「衣」或者唔要中間嘅流質，不過我試過分別就唔大，咁樣反而原汁原味，亦都慳返唔少時間。話咁快我就切好喇，睇吓啲番茄幾靚！
薯仔洗乾淨表面之後，刨皮切粒，大細同蕃茄差唔多就 OK。薯仔嘅份量其實可多可少，放多啲啖湯就粉啲，唔鍾意咁粉嘅，其實落一個或者唔落都 OK 㗎！
今日我買咗大約 $25 嘅瘦肉，搵清水沖一沖之後切薄片，跟住用生抽同埋少少胡椒粉醃一醃。
放大約 8 至 10 碗水落個煲入面，跟住開火，水滾之後先好放材料，記得放埋幾片薑，跟住用大火滾大約30分鐘，睇吓！蕃茄差唔多都溶晒，啖湯亦都變咗好靚嘅橙紅色，呢個時候落大約半至一茶匙嘅鹽調味，跟住就飲得㗎喇！
