生活部落格

播出日期:24/12/2020

聖誕新年佳節,燒春雞係其中一款節日美食。唔好以為好難攪喎,其實一個氣炸鍋就搞掂!宜家就同大家睇下!

一般嘅超級市場就有得賣呢啲細細隻嘅急凍春雞。想快速解凍,可以連包裝浸落室溫水入面30-40分鐘,之後就可以醃㗎喇!睇睇醃雞嘅材料先!

將七至八件嘅蒜頭啄成蒜蓉,如果唔想自己啄,可以去超市買現成玻璃樽裝蒜蓉用!跟住準備20至30克嘅牛油,用細火同易潔鑊溶咗牛油之後,加入啄好嘅蒜蓉,再加入適量嘅香草,同埋幼鹽、黑胡椒以及雞粉各少許,攪勻待用。

春雞用清水洗乾淨,將準備好嘅醃料分為兩份,一份搽入雞殼內籠,剩返嘅就搽喺表面。之後放落保鮮袋,再放入雪櫃醃兩個鐘或者以上。

如果唔想洗氣炸鍋洗得咁辛苦,可以先放一張牛油紙或者我呢啲氣炸鍋專用嘅底盤紙入去,再將醃好嘅雞放入氣炸鍋。之後用180度熱力焗20分鐘,拎出嚟之後均勻噴上蜜糖,再用200度火焗多5分鐘就食得! 切開睇下先!熟嘅程度啱啱好,食落口嫩滑多汁,正呀!

醃料:
牛油 20-30克
幼鹽 少許
黑胡椒 少許
蒜頭 約7-8細件
香草 適量
雞粉 少許

追蹤我們
公司殊榮
Copyright Claims
Copyright Claims