播出日期:23/5/2018
最新嘅科技資料、潮流玩意，都有《Z世代達人》麥卓華到處搜羅送到你面前！
早前八達通聯同Samsung推出左內置於Samsung Pay錢包入面嘅Smart Octopus虛擬八達通卡，除左一般嘅八達通功能之外，仲加入咗用Samsung Pay入面嘅信用卡即時增值功能。今日就同大家一齊申請同試用！
今日就用我部S8試下呢個服務。我之前已經登記咗Samsung Pay功能，打開Samsung Pay，之後按八達通嘅選項，入到來可以選擇轉移你現有嘅八達通卡到呢部電話，或者開過一張全新卡。我就揀咗開過張全新嘅成人八達通，同意埋相關嘅使用條款後，就來到付款一欄。你可以選擇第一次要儲值嘅金額，我就揀左$100，加埋$50既八達通按金，同埋留番將來退款用嘅人名及電話號碼，之後就會來到付款頁面，以Samsung Pay錢包入面既信用卡俾錢就完成。之後大約需要1分鐘，呢張卡就成功加入Samsung Pay錢包喇！
頭先提過，除左一般嘅自動增值或者以現金於便利店增值外，Smart Octopus仲可以透過Samsung Pay入面嘅信用卡增值，最低每次金額係$300。不過留意喇，以信用卡堵值Smart Octopus，係會有2.5%嘅手續費，不過在推廣期內首$1000增值額所收取嘅增值費用係會全數回贈。
如果大家有留意，其實之前都有網絡商推出過八達通SIM卡服務，咁如果已經用緊呢種八達通Sim，仲可唔可以用埋Smart Octopus呢？ 原來係可以架！ 好似我咁，之前一直用開內置於SIM卡入面嘅八達通Sim，頭先加埋張Smart Octopus，部機就即係有兩張八達通卡喇。但俾錢嘅時候，究竟會扣邊張八達通呢？ 原來我地可以自己Set架！
當你設定完成咗張Smart Octopus之後，系統其實會提示你，預設呢張新嘅Smart Octopus俾錢。
咁如果想用番內置嘅SIM卡八達通又可以點呢？去設定、連接、NFC與付款、再按右上角嘅「預設NFC方式」、本來用Smart Octopus嘅設定係崁入式安全元件，只要改番用SE Sim卡就可以了。
《Z世代達人》
主持：麥卓華
